କେନ୍ଦ୍ର ଶକ୍ତି, ନୂତନ ଏବଂ ନବୀକରଣ ଯୋଗ୍ୟ ଶକ୍ତି ମନ୍ତ୍ରଣାଳୟ ରାଷ୍ଟ୍ର ମନ୍ତ୍ରୀ ଆର୍.କେ. ସିଂହ କହିଛନ୍ତି, ଦେଶରେ ଅକ୍ଷୟ ଶକ୍ତି କ୍ଷମତାର ଅଭିବୃଦ୍ଧିହାର ବିଶ୍ୱରେ ସର୍ବାଧିକ। ତାପମାତ୍ରାକୁ ସୀମିତ ରଖିବାରେ ଭାରତର ଏହି ଉଦ୍ୟମକୁ ମଧ୍ୟ ସମଗ୍ର ବିଶ୍ୱ ସ୍ୱୀକୃତି ପ୍ରଦାନ କରିଛି। ମନ୍ତ୍ରୀ ଶ୍ରୀ ସିଂହ କହିଛନ୍ତି, ଜୀବାସ୍ମ ଇନ୍ଧନରୁ ସବୁଜ ଶକ୍ତି କ୍ଷେତ୍ରକୁ ରୂପାନ୍ତରିତ କରିବା ଭାରତର ଏକ ପ୍ରମୁଖ ପଦକ୍ଷେପ ଏବଂ ଏ କ୍ଷେତ୍ରରେ ଭାରତ ବିଶ୍ୱରେ ନିଜର ପରିଚୟକୁ ଅଧିକ ଦୃଢ଼ କରିପାରିଛି। ସେ କହିଛନ୍ତି, ପ୍ୟାରିସ୍ ଜଳବାୟୁ ଚୁକ୍ତିନାମା ଅନୁଯାୟୀ ରହିଥିବା ଲକ୍ଷ୍ୟକୁ ଭାରତ କେବଳ ହାସଲ କରିନାହିଁ ବରଂ ଏହାକୁ ଅତିକ୍ରମ କରିସାରିଛି। ନବୀକରଣ ଯୋଗ୍ୟ ଶକ୍ତିର ମହତ୍ୱ ଉପରେ ଗୁରୁତ୍ୱ ଦେଇ ଶ୍ରୀ ସିଂହ କହିଛନ୍ତି, ପରିବେଶ ଏବଂ ବିଶ୍ୱ ତାପମାତ୍ରା ପାଇଁ ଅଙ୍ଗାରକାମ୍ଳ ନିର୍ଗମନ ଏକ ପ୍ରମୁଖ ଚିନ୍ତାର କାରଣ ହୋଇଛି। ବିଶ୍ୱର ପ୍ରତ୍ୟେକ ଦେଶ ଏହାକୁ ହୃଦୟଙ୍ଗମ କରିଛନ୍ତି। ତେବେ ଅଙ୍ଗାରକାମ୍ଳ ନିର୍ଗମନକୁ ହ୍ରାସ କରିବା ଲାଗି ମିଳିତ ପ୍ରୟାସ ଜାରି ରହିଛି ବୋଲି ଶ୍ରୀ ସିଂହ କହିଛନ୍ତି। ସେ କହିଛନ୍ତି, ଜୀବାସ୍ମ ଇନ୍ଧନରୁ ଉତ୍ପନ୍ନ ଶକ୍ତି ତୁଳନାରେ ନବୀକରଣ ଯୋଗ୍ୟ ଶକ୍ତି ଅଧିକ ଶସ୍ତା ଅଟେ।