ଭୁବନେଶ୍ୱର: ପଦ୍ମବିଭୂଷଣ ରଘୁନାଥ ମହାପାତ୍ରଙ୍କ ଏକାଦଶାହ ଯାଇନଥିବା ବେଳେ ଆଜି ତାଙ୍କର ବଡ ପୁଅ ରଣଜୀ କ୍ରିିକେଟର ପ୍ରଶାନ୍ତ ମହାପାତ୍ରଙ୍କର କରୋନାରେ ମୃତ୍ୟୁ ଘଟିଛି । ଭୁବନେଶ୍ୱର ଏମ୍ସରେ ସେ କରୋନା ଆକ୍ରାନ୍ତ ହୋଇ ଚିକିତ୍ସାଧୀନ ଥିଲେ । ପ୍ରଶାନ୍ତଙ୍କ ଭାଇ ତଥା ସ୍ୱର୍ଗତ ମହାପାତ୍ରଙ୍କ ସାନ ପୁଅ ଯଶୋବନ୍ତଙ୍କ ସ୍ୱାସ୍ଥ୍ୟବସ୍ଥା ମଧ୍ୟ ଗୁରୁତର ରହିଛି । ସେ ଏବେ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅଛନ୍ତି । ଏହି ଘଟଣା ବିଭିନ୍ନ ମହଲରୁ ଶୋକର ଛାୟା ଖେଳାଇ ଦେଇଛି ।
ପ୍ରଶାନ୍ତ ମହାପାତ୍ରଙ୍କ ମୃତ୍ୟୁ ନେଇ ଏମ୍ସ ସୁପରିଟେନଡେଂଟ ଡାକ୍ତର ସଚ୍ଚିଦାନନ୍ଦ ମହାନ୍ତି ସୂଚନା ଦେଇଛନ୍ତି । ସେ କହିଛନ୍ତି ଯେ, କୋଭିଡ୍ ଆକ୍ରାନ୍ତ ହୋଇ ଏମ୍ସରେ ଚିକିତ୍ସାଧୀନ ଥିଲେ । ଚିକିତ୍ସା ପରେ ତାଙ୍କର କୋଭିଡ୍ ରିପୋର୍ଟ ନେଗେଟିଭ୍ ହୋଇଥିଲା । ମାତ୍ର ଡାକ୍ତରଙ୍କର ସବୁ ଚେଷ୍ଟା ପରେ ବି ସେ ଆଖି ବୁଜିଦେଇଛନ୍ତି । ପ୍ରଶାନ୍ତ ମହାପାତ୍ର ଓଡିଶା ପାଇଁ ଅନେକ ରଣଜୀ ମ୍ୟାଚ୍ ଖେଳି ସୁନାମ ଅର୍ଜନ କରିଥିଲେ । ୯୦ ଦଶକର ରଣଜୀ ଦଳର ସେ ଦକ୍ଷ ଓପନର ଥିବାବେଳେ ଗତ ୯ ତାରିଖରେ ତାଙ୍କ ବାପା ରଘୁନାଥ ମହାପାତ୍ରଙ୍କର ଦେହାନ୍ତ ହୋଇଥିଲା ।