ମୁମ୍ବାଇ- ପଞ୍ଜାବୀ ଏବଂ ହିନ୍ଦୀ ଫିଲ୍ମ ଜଗତରେ ଜଣାଶୁଣା ରଞ୍ଜନ ସେହଗଲ ଆଉ ନାହାନ୍ତି । ମାତ୍ର ୩୬ ବର୍ଷ ବୟସରେ ତାଙ୍କର ମୃତ୍ୟୁ ଘଟିଛି । ସେ ଅନେକ ଦିନ ହେଲା ଅସୁସ୍ଥ ଥିଲେ ଏବଂ ତାଙ୍କ ଶରୀରରେ ଅନେକ ଅଙ୍ଗ କାର୍ଯ୍ୟ କରିବା ବନ୍ଦ ହୋଇଯାଇଥିଲା ବୋଲି ସୂତ୍ରରୁ ଜଣାପଡିଛି । ରଞ୍ଜନ ରଣଦୀପ ଏବଂ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ଲୋକପ୍ରିୟ ଫିଲ୍ମ ସରବଜିତରେ ଅଭିନୟ କରି ଦୃଷ୍ଟି ଆକର୍ଷଣ କରିଥିଲେ ।
ସେ ଏକାଧିକ ପଞ୍ଜାବୀ ଫିଲ୍ମ ତଥା ଟିଭି ସିରିଏଲରେ ଅଭିନୟ କରି ଲୋକପ୍ରିୟତା ହାସଲ କରିଥିଲେ । ୨୦୧୭ ରେ ରିଲିଜ୍ ପଞ୍ଜାବୀ ଫିଲ୍ମ ‘ମାହି ଏନଆରଆଇ’ ଏବଂ ୨୦୧୪ ରେ ରିଲିଜ୍ ଫିଲ୍ମ ‘ୟାରାଁ ଦା କ୍ୟାଚଅପ୍’ ରେ ମଧ୍ୟ ଅଭିନୟ କରି ପ୍ରଶଂସା ସାଉଁଟିଛନ୍ତି । ରଞ୍ଜନ ପଞ୍ଜାବୀ ହୋଇଥିବା ବେଳେ ସେ ଚଣ୍ଡିଗଡରେ ରହୁଥିଲେ । ସେ ପଞ୍ଜାବ ୟୁନିଭର୍ସିଟିରୁ ଥିଏଟର ଷ୍ଟଡିଜର ମାଷ୍ଟର ଡିଗ୍ରୀ ହାସଲ କରିଛନ୍ତି । ଏହାପରେ ରଞ୍ଜନ ମୁମ୍ବାଇ ଆସି ରିସ୍ତୋଁ ସେ ବଡି ପ୍ରଥା , ତୁମ ଦେନା ସାଥ ମେରା, କ୍ରାଇମ ପେଟ୍ରୋଲ, ସାବଧାନ ଇଣ୍ଡିଆ ଭଳି ଲୋକପ୍ରିୟ ଟିଭି ସିରିୟଲ ଗୁଡିକରେ କାମ କଲେ । ୨୦୧୪ରେ କଷ୍ଟ୍ୟୁମ ଡିଜାଇନର ନିବ୍ୟା ଛାବଡାଙ୍କୁ ବିବାହ କରିଥିଲେ ।