କରୋନା ମହାମାରୀ ସମୟରେ ପୁଲିସ କର୍ମଚାରୀ ହେଉଛନ୍ତି ଆଗଧାଡ଼ିର ଯୋଦ୍ଧା। ମହାମାରୀ ସଂକ୍ରମଣ ରୋକିବାରେ ସେମାନଙ୍କ ଭୂମିକା ବେଶ୍ ଗୁରୁତ୍ଵପୂର୍ଣ୍ଣ। ତେଣୁ ପୁଲିସ ବିଭାଗ ଏବେ ଆଲର୍ଟରେ ରହିଛି। କର୍ମଚାରୀମାନେ ଦିନରାତି ଡ୍ୟୁଟି କରୁଛନ୍ତି। ଏଥିପାଇଁ ପୁଲିସ କର୍ମଚାରୀଙ୍କୁ ଅଧିକାଂଶ ସମୟରେ ଛୁଟି ମିଳୁନାହିଁ। ଏହି କାରଣ ଯୋଗୁ ଜଣେ ମହିଳା କନଷ୍ଟେବଳଙ୍କର ବିବାହ ପୂର୍ବରୁ ହେବାକୁ ଥିବା ହଳଦୀ ବିଧି ଥାନାରେ ହିଁ ସମ୍ପନ୍ନ ହୋଇଛି। ଏଭଳି ଦୃଶ୍ୟ ଦେଖିବାକୁ ମିଳିଛି ରାଜସ୍ଥାନର ଡୁଙ୍ଗରପୁର ଜିଲା ଅନ୍ତର୍ଗତ କୋତୱାଲି ଥାନାରେ।
ରାଜସ୍ଥାନରେ କରୋନା ସଂକ୍ରମଣ ଦ୍ରୁତିଗତିରେ ବଢ଼ିବାରେ ଲାଗିଛି। ତେଣୁ ପୁଲିସ କର୍ମଚାରୀମାନେ ଅବିରତ ଡ୍ୟୁଟି କରୁଛନ୍ତି। ସେମାନଙ୍କୁ ଅଧିକ ଛୁଟି ମିଳୁନାହିଁ। ରାଜ୍ୟର କୋତଓ୍ବାଲି ଥାନାରେ କାର୍ଯ୍ୟତର ମହିଳା କନଷ୍ଟେବଳ ଆଶା ରୋତ୍ନଙ୍କର ଆସନ୍ତା ୩୦ ତାରିଖରେ ବିବାହ। ବିବାହ ପାଇଁ ତାଙ୍କୁ ଛୁଟି ମିଳିଛି। ହେଲେ ବିବାହ ପୂର୍ବରୁ ହେବାକୁ ଥିବା ଅନ୍ୟାନ୍ୟ ରୀତିନୀତି ପାଇଁ ତାଙ୍କୁ ଛୁଟି ମିଳିନାହିଁ। ତେଣୁ ସେ ଘରଠାରୁ ଦୂରରେ ରହିଛନ୍ତି।
ତେଣୁ ଶୁକ୍ରବାର ଆଶାଙ୍କର ହଳଦୀ ବିଧି ସମ୍ପନ୍ନ ହେବାକୁ ଥିବାବେଳେ ସହକର୍ମୀମାନେ ଏହାକୁ ଥାନାରେ ପାଳନ କରିଛନ୍ତି। ଥାନାର ସମସ୍ତ କର୍ମଚାରୀଙ୍କ ଉପସ୍ଥିତିରେ ଆଶାଙ୍କର ହଳଦୀ ବିଧି ଅନୁଷ୍ଠିତ ହୋଇଯାଇଛି। ଘରେ ଯେପରି ଆଶା ପରିବାର ଲୋକଙ୍କ ଗହଣରେ ଏହି ଉତ୍ସବଟିକୁ ପାଳନ କରିଥାନ୍ତେ, ଠିକ୍ ସେଭଳି ଅନ୍ୟ କର୍ମଚାରୀମାନେ ଏହାକୁ ଆୟୋଜନ କରିଥିଲେ।