ନୂଆଦିଲ୍ଲୀ: ମ୍ୟାଁମାରରେ ସୈନ୍ୟ ବାହିନୀ ଗତ ଫେବ୍ରୁଆରୀରେ ଏକ ସାମରିକ ବିଦ୍ରୋହ ବଳରେ କ୍ଷମତା ଅକ୍ତିଆର କରିବା ପରଠାରୁ ଉକ୍ତ ରାଷ୍ଟ୍ରରେ ବ୍ୟାପକ ଅସ୍ଥିରତା ଦେଖାଦେଇଛି। ସେଠାରେ ଲାଗିରହିଥିବା ସଙ୍କଟର ସମାଧାନ ଦିଗରେ (ଆସୋସିଏସନ ଅଫ ସାଉଥ ଏସିଆନ ନେସନ୍ସ) ଆସିଆନ୍ ରାଷ୍ଟ୍ରଗୁଡିକର ଉଦ୍ୟମକୁ ପ୍ରଶଂସା କରିଛି ଭାରତ। ଏ କ୍ଷେତ୍ରରେ ନୂଆଦିଲ୍ଲୀ ଗଠନମୂଳକ ଓ ଅର୍ଥପୂର୍ଣ୍ଣ ଭୂମିକା ନିର୍ବାହ କରିବ ବୋଲି କହିଛନ୍ତି ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ।
ସେ କହିଛନ୍ତି, ଚଳିତ ମାସ ୨୪ ତାରିଖରେ ଆସିଆନ୍ ବୈଠକରେ ମ୍ୟାଁମାର ପ୍ରସଙ୍ଗକୁ ନେଇ ରାଷ୍ଟ୍ରଗୁଡିକ ପଦକ୍ଷେପ ନେବାକୁ ଏକ ସହମତିରେ ପହଞ୍ଚିଛନ୍ତି। ଭାରତ ଏହାକୁ ସ୍ୱାଗତ କରୁଛି। ଏହି ପ୍ରୟାସକୁ ଅଧିକ ସୁଦୃଢ କରିବା ଦିଗରେ ନୂଆଦିଲ୍ଲୀ କୂଟନୈତିକ ସ୍ତରରେ ଉଦ୍ୟମ ଜାରି ରଖିବ। ଉଲ୍ଲେଖଯୋଗ୍ୟ ଯେ, ଫେବ୍ରୁଆରୀ ୧ ତାରିଖରେ ସେ ଦେଶର ସୈନ୍ୟବାହିନୀ ଶାସନ କ୍ଷମତା ଦଖଲ କରିବା ପରଠାରୁ ସେଠାରେ ଦେଶବ୍ୟାପୀ ସୈନ୍ୟବାହିନୀ ବିରୁଦ୍ଧରେ ବ୍ୟାପକ ବିରୋଧାଭାସ ଚାଲିଛି। ବିରୋଧ କରୁଥିବା ପିଲାଙ୍କ ଠାରୁ ଆରମ୍ଭ କରି ଦେଶର ଶହ ଶହ ଲୋକଙ୍କୁ ସୈନ୍ୟବାହିନୀ ହତ୍ୟା କରିଛି। ମ୍ୟାଁମାର ସଂକ୍ରାନ୍ତରେ ଆସିଆନ୍ ରବିବାର ଦିନ ଏକ ପାଞ୍ଚସୂତ୍ରୀ ସହମତି ପତ୍ର ପ୍ରକାଶ କରିଛି। ସେଥିରେ ତୁରନ୍ତ ହିଂସା ବନ୍ଦ କରିବା ଏବଂ ସମସ୍ତ ପକ୍ଷଙ୍କ ମଧ୍ୟରେ ଗଠନମୂଳକ ଆଲୋଚନା କରାଯାଇ ସଙ୍କଟର ସମାଧାନ ପନ୍ଥା ନିରୂପଣ କରିବାକୁ କୁହାଯାଇଛି। ମ୍ୟାଁମାର ମଧ୍ୟ ଏହି ଦଶ ସଦସ୍ୟ ବିଶିଷ୍ଟ ରାଷ୍ଟ୍ରସଂଘରେ ସଦସ୍ୟ ରହିଛି।
ଶ୍ରୀ ବାଗଚୀ କହିଛନ୍ତି, ମ୍ୟାଁମାରର ଏକ ବନ୍ଧୁରାଷ୍ଟ୍ର ଭାବରେ ଭାରତ ସେଠାକାର ସାମ୍ପ୍ରତିକ ପରିସ୍ଥିତି ସମାଧାନ ଦିଗରେ ଗଠନମୂଳକ ଏବଂ ଅର୍ଥପୂର୍ଣ୍ଣ ଭୂମିକା ନିଭାଇବ। ସେଠାରେ ଗଣତାନ୍ତ୍ରିକ ପ୍ରକ୍ରିୟାକୁ ଭାରତ ସମର୍ଥନ ଜଣାଉଛି।