ଦୁବାଇ : ଚଳିତମାସ ୧୯ରୁ ୟୁଏଇରେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ଶ ସଂସ୍କରଣ ଖେଳାଯିବ। ଏହି ଟୁର୍ଣ୍ଣାମେଣ୍ଟ ଖେଳିବା ପାଇଁ ୮ଟିଯାକ ଫ୍ରାଞ୍ଚାଇଜି ଗତମାସଠାରୁ ୟୁଏଇରେ ରହିଛନ୍ତି। ଏବେ ଆଇପିଏଲ୍ରେ ସେବା ଯୋଗାଣକାରୀ ସଂସ୍ଥା, ପ୍ରସାରଣକାରୀ ଷ୍ଟାର୍ ସ୍ପୋର୍ଟସ ଓ ଆଇପିଏଲ୍ ଆୟୋଜନ ସହ ଜଡ଼ିତ କର୍ମକର୍ତ୍ତା ଚଳିତମାସ ପ୍ରାରମ୍ଭରୁ ୟୁଏଇରେ ପହଞ୍ଚି ପ୍ରସ୍ତୁତି ତଦାରଖ କରୁଛନ୍ତି। ବୁଧବାର ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (ବିସିସିଆଇ)ର ସଭାପତି ଆଇପିଏଲ୍ ଆୟୋଜନ ଓ ପ୍ରସ୍ତୁତିର ତଦାରଖ କରିବା ପାଇଁ ଦୁବାଇରେ ପହଞ୍ଚିଛନ୍ତି। ଭାରତରେ କରୋନା ସଂକ୍ରମଣ ବଢ଼ି ଚାଲିଥିବା ବେଳେ ଆଇପିଏଲ୍ ଚଳିତବର୍ଷ ୟୁଏଇର ୩ଟି ସହର ଦୁବାଇ, ଆବୁଧାବି ଓ ଶାରଜାରେ ଖେଳାଯିବ। ଗତବର୍ଷର ଦୁଇ ଫାଇନାଲିଷ୍ଟ ମୁମ୍ବଇ ଇଣ୍ଡିଆନ୍ସ ଓ ଚେନ୍ନଇ ସୁପର କିଙ୍ଗ୍ସ ମଧ୍ୟରେ ଉଦ୍ଘାଟନୀ ମ୍ୟାଚ୍ ଖେଳାଯିବ।