ଭୁବନେଶ୍ୱର: ହାଇୱେ ପାଟ୍ରୋଲିଂ ସେବା ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭିଡିଓ କନଫରେସିଂ ଜରିଆରେ ହାଇୱେ ପାଟ୍ରୋଲିଂ ସବୋର ଶୁଭାରମ୍ଭ କରାଯାଇଛି । ମୁଖ୍ୟମନ୍ତ୍ରୀ ପତାକା ଦେଖାଇ ଏହି ସେବାର ଆରମ୍ଭ କରିଛନ୍ତି । ସଡକ ଦୁର୍ଘଟଣାକୁ ରୋକିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ୧୮ଟି ଜିଲ୍ଲାର ଜାତୀୟ ଓ ରାଜ୍ୟ ରାଜପଥ ଗୁଡିକରେ ୩୬ଟି ହାଇୱେ ପାଟୋଲିଂ ଗାଡି ବୁଲିବ ।
ଭୁବନେଶ୍ୱର, ଖୋର୍ଦ୍ଧା, ମଙ୍ଗୁଳି, ପାଣିକୋଇଲି ରାଜପଥ ଉପରେ କଡା ନଜର ରଖିବ ଏହି ପାଟ୍ରୋଲିଂ ଗାଡି । ଜାତୀୟ ଓ ରାଜ୍ୟ ରାଜପଥରେ ବିଭିନ୍ନ ସମୟରେ ଘଟୁଥିବା ଦୁର୍ଘଟଣା, ଅପରାଧ, ଗୁଣ୍ଡାରାଜ ଓ ଦ୍ରୁତ ଗାଡି ଚାଳନା ଉପରେ ରୋଗ ଲଗାଇବ, ହାଇୱେ ପାଟ୍ରୋଲିଂ ସେବା । ଜାତୀୟ ରାଜପଥରେ ହେଉଥିବା ଅପରାଧିକ କାର୍ଯ୍ୟକଳାପ ରୋକିବା ପାଇଁ ଓଡିଶା ପୋଲିସ ପକ୍ଷରୁ ଏହି ସେବା ଆରମ୍ଭ ହୋଇଛି । କଟକ ଟାଙ୍ଗୀ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ ଉପରେ ଥିବା ମଙ୍ଗୁଳି ଏକ ବ୍ୟସ୍ତ ବହୁଳ ଅଞ୍ଚଳ । ହାଇୱେ ପାଟ୍ରୋଲି ସେବାର ଶୁଭାରମ୍ଭ ନେଇ ଏଠାରେ କଟକ ଜିଲ୍ଲା ଗ୍ରାମାଞ୍ଚଳ ଏସ୍.ପି ଯୁଗୋଳ କିଶୋରଙ୍କ ନେତୃତ୍ୱରେ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ମନ୍ତ୍ରୀ ଦିବ୍ୟ ଶଙ୍କର ମିଶ୍ର, ପୋଲିସ ଡି.ଜି ଅଭୟ ଆଇ.ଜି କ୍ରାଇମ୍ ଅମିତେନ୍ଦ୍ର ନାଥ ସିହ୍ନା, ଜିଲ୍ଲାପାଳ ଭବାନୀ ଶଙ୍କର ଚାଇନି, ସାଲେପୁର ବିଧାୟକ ପ୍ରଶାନ୍ତ ବେହେରାଙ୍କ ସମେତ ବହୁ ପଦାଧିକାରୀ ଏହି କାର୍ଯ୍ୟକ୍ରମରେ ସାମିଲ୍ ହୋଇଥିଲେ । ମୁଖ୍ୟମନ୍ତ୍ରୀ ଭିଡିଓ କନଫରେନ୍ସିଂ ଜରିଆରେ ସବୁଜ ପତାକା ଦେଖାଇବା ପରେ ରାଜପଥରେ ହାଇୱେ ପାଟ୍ରୋଲିଂ ଗାଡି ଗଡିଛି । ଏହି ଗାଡି ୧୬ ନମ୍ବର ରାଜପଥରେ ମଙ୍ଗୁଳି ଠାରୁ ଛତିଆ, ୫୫ ନମ୍ବର ରାଜପଥ ମଙ୍ଗୁଳି ଠାରୁ ଛତିଆ ଓ ମଙ୍ଗୁଳି ଠାରୁ ଖୁଂଟୁଣି ପର୍ଯ୍ୟନ୍ତ ପାଟ୍ରୋଲିଂ କରିବ । ଅମାନିଆ ମଦ୍ୟପ ଗାଡି ଚାଳକଙ୍କୁ ସାବାଡ କରିବା ସହ ଅନ୍ୟ ସମସ୍ତ ଘଟଣା ଉପରେ କଡା ନଜର ରଖିବ । ଭୁବନେଶ୍ୱରରେ ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ନବୀନ ପଟନାୟକ ଏହି ସେବାର ଉଦ୍ଘାଟନ କରିଥିବା ବେଳେ ଖୋର୍ଦ୍ଧାରେ ୩ଟି ପାଟ୍ରୋଲିଂ ଗାଡିର ଶୁଭାରମ୍ଭ ହୋଇଛି । ଜିଲ୍ଳା ଯୋଜନା କମିଟି ଅଧ୍ୟକ୍ଷ ପ୍ରଶାନ୍ତ ଜଗଦେବ୍, ଖୋର୍ଦ୍ଧା ବିଧାୟକ ଜିତୁ ମିତ୍ର, ପୋଲିସ୍ ଡିଆଇଜି ଆଶିଷ ସିଂ, ଜିଲ୍ଲାପାଳ ସନତ ମହାନ୍ତିଙ୍କ ଉପସ୍ଥିତିରେ ହାଇୱେ ପାଟୋଲିଂ ଗାଡି ଗଡିଛି । ଏହି ୩ଟି ହାଇୱେ ପାଟ୍ରୋଲିଂ ଗାଡି ଖୋର୍ଦ୍ଧା ପିତାପଲି ଠାରୁ ବାଲୁଗାଁ ଯାଏଁ ରାଜପଥ ଉପରେ ନଜର ରଖିବ ।
ସେହିଭଳି ଯାଜପୁର ପାଣିକୋଇଲି ସ୍ଥିତ ପୋଲିସ୍ ମୁଖ୍ୟାଳୟରେ ହାଇୱେ ପେଟ୍ରୋଲିଂ ସେବାର ଶୁଭାରମ୍ଭ ହୋଇଛି । ପ୍ରଥମ ପର୍ଯ୍ୟାୟରେ ୨ଟି ଗାଡି ହାଇୱେ ପେଟ୍ରୋଲିଂ ସେବାରେ ଲାଗିଛି । ଆଗକୁ ଆହୁରି ୩/୪ଟି ଗାଡି ଏହି ସେବାରେ ସାମିଲ କରାଯିବ । ଯାଜପୁର ଜିଲ୍ଲା ଦେଇ ଯାଇଥିବା ୧୬ ନମ୍ବର ଓ ୨୦ ନମ୍ବର ଜାତୀୟ ରାଜପଥରେ ହାଇୱେ ପାଟ୍ରୋଲିଂ ଗାଡି ବୁଲିବ । ଏବଂ ଜାତୀୟ ରାଜପଥରେ ଘଟୁଥିବା ଅପରାଧିକ କାର୍ଯ୍ୟକଳାପ ଉପରେ ନଜର ରଖାଯିବ ବୋଲି ଏସ୍.ପି ସୂଚନା ଦେଇଛନ୍ତି ।