ଧାମରା : ଦୁର୍ଘଟଣା ଜନିତ ମୃତ୍ୟୁ ଶୂନ୍ୟ ସପ୍ତାହ ଅବସରରେ ଆଞ୍ଚଳିକ ପରିବହନ କାର୍ଯ୍ୟାଳୟ (ଆରଟିଓ, ଭଦ୍ରକ) ଏବଂ ଧାମରା ପୋର୍ଟର ମିଳିତ ସହଯୋଗରେ ଦୁର୍ଘଟଣା ଜନିତ ମୃତ୍ୟୁ ଶୂନ୍ୟ ସପ୍ତାହ ପାଳିତ ହୋଇଯାଇଛି । ଏହି ଅବସରରେ ଆଞ୍ଚଳିକ ପରିବହନ ଅଧିକାରୀ ଶ୍ରୀ ଖଗେଶ୍ୱର ମୂର୍ମୁ ଏବଂ ପୋର୍ଟର ଉଚ୍ଚପଦସ୍ଥ ଅଧିକାରୀଙ୍କ ତତ୍ତ୍ୱାବଧାନରେ ଧାମରା ପୋର୍ଟ ପରିସରରେ ଗାଡି ପରିଚାଳକମାନଙ୍କ ପାଇଁ ସଚେତନତା କାର୍ଯ୍ୟକ୍ରମ ତଥା ସଡକ ସୁରକ୍ଷା ଭିତ୍ତିକ ପଥପ୍ରାନ୍ତ ନାଟକ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଶ୍ରୀ ମୂର୍ମୁ ବିଭିନ୍ନ ଯୋଜନା ବିଷୟରେ ଅବଗତ କରାଇବା ସହ ଟ୍ରାଫିକ୍ ସମ୍ବନ୍ଧିତ ନିୟମାବଳୀ ଉପରେ ଆଲୋକପାତ କରିଥିଲେ । ଏତଦ୍ ବ୍ୟତୀତ ଗାଡିଚାଳକ ମାନଙ୍କ ମଧ୍ୟରେ ସଡକ ସୁରକ୍ଷା ଉପରେ କୁଇଜ୍ ପ୍ରତିଯୋଗିତା ଅନୁଷ୍ଠିତ ହେବା ସହ ରକ୍ଷଣଶୀଳ ଚାଳକମାନଙ୍କୁ ପୁରସ୍କୃତ କରାଯାଇଥିଲା । ଏହି ଅବସରରେ ଆରଟିଓ, ଭଦ୍ରକଙ୍କ ଆଗ୍ରହ କ୍ରମେ ସନ୍ସାଇନ୍ ସ୍କୁଲ ପଡିଆରେ ଆୟୋଜିତ ପୁସ୍ତକ ମେଳାରେ ସଡକ ସୁରକ୍ଷା ଭିତ୍ତିକ ଏକ ନାଟକ ପରିବେଷଣ ହୋଇଥିଲା, ଯାହା ଲୋକଙ୍କ ଦ୍ୱାରା ବେଶ୍ ଆଦୃତ ହୋଇଥିଲା ।