ବ୍ରହ୍ମପୁର : ସର୍ବ ଭାରତୀୟ ଭାରୋତ୍ତୋଲନ ପ୍ରତିଯୋଗିତାରେ ଗଞ୍ଜାମ ଜିଲ୍ଲାର ବୁଗୁଡା ବ୍ଲକ ଅନ୍ତର୍ଗତ ବାଲିପଦର ଆଞ୍ଚଳିକ ବିଜ୍ଞାନ ସ୍ନାତକ ମହାବିଦ୍ୟାଳୟର ଛାତ୍ରୀ ସନ୍ଧ୍ୟାରାଣୀ ନାୟକ ବ୍ରୋଞ୍ଜ ପଦକ ପାଇ କଲେଜ,ବ୍ଲକ, ଜିଲ୍ଲା ଓ ରାଜ୍ୟ ପାଇଁ ଗୌରବ ଆଣିପାରିଥିବାରୁ ଅଞ୍ଚଳରେ ଆନନ୍ଦର ଲହରୀ ଖେଳିଯାଇଛି। ସର୍ବ ଭାରତୀୟ ସ୍ତରରେ କଲିକତା ଠାରେ ୩/୧୨/୨୩ ଠାରୁ ୬/୧୨/୨୩ ପର୍ଯ୍ୟନ୍ତ ଖେଲୋ ଇଣ୍ଡିଆ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଖେଲୋ ଇଣ୍ଡିଆ ପ୍ରତିଯୋଗୀତର ଭାରୋତ୍ତୋଲନ ବିଭାଗରେ ବାଲିପଦର କଲେଜ ପକ୍ଷରୁ ସନ୍ଧ୍ୟାରାଣୀ ନାୟକ ଅଂଶ ଗ୍ରହଣ କରି ବିଜୟୀ ହୋଇ ବ୍ରୋଞ୍ଜ ପଦକ ହାସଲ କରିଛନ୍ତି। ସନ୍ଧ୍ୟାରାଣୀ +୩ ରାଜନୀତି ବିଜ୍ଞାନ ଅନର୍ସର ଛାତ୍ରୀ ହୋଇଥିବାବେଳେ କ୍ରୀଡା ଅଧ୍ୟାପକ ଭଞ୍ଜ କିଶୋର ଗୌଡ଼ଙ୍କ ତତ୍ତ୍ୱାବଧାନରେ ଅଭ୍ୟାସ କରି ଏହି ଗୌରବ ଆଣିପାରିଛନ୍ତି। ଏହି ଖବର ଜାଣିବା ପରେ କଲେଜର ଅଧ୍ୟକ୍ଷ, ଅଧ୍ୟାପକ, ଅଧ୍ୟାପିକା, କର୍ମକର୍ତ୍ତା ବୃନ୍ଦ ସନ୍ଧ୍ୟାରାଣୀଙ୍କୁ ଅଭିନନ୍ଦନ ଜଣାଇଛନ୍ତି।