ଖୁନ୍ତାମାଲ: କରୋନା ମହାମାରୀ ଯୋଗୁଁ ରାଜ୍ୟରେ ଦୀର୍ଘ ୯ମାସ ଧରି ବନ୍ଦ ରହିଥିବା ଶିକ୍ଷାନୁଷ୍ଠାନ ଗୁଡ଼ିକ ଗତ ୮ ତାରିଖରୁ ଖୋଲିଛି । ତେବେ ସ୍କୁଲ ଖୋଲିବାର ୫ ଦିନ ମଧ୍ୟରେ ଝାରସୁଗୁଡ଼ା ଜିଲ୍ଲାର ଲଇକେରା ବ୍ଲକ ଅନ୍ତର୍ଗତ ତିନୋଟି ହାଇସ୍କୁଲର ୧୯ ଜଣ ଛାତ୍ରଛାତ୍ରୀ କରୋନା ପଜିଟିଭ ଚିହ୍ନଟ ହେବା ଘଟଣା ଜିଲ୍ଲା ପ୍ରଶାସନର ଚିନ୍ତା ବଢ଼ାଇ ଦେଇଛି । ଲଇକେରା ବିଇଓ ପ୍ରଦୀପ୍ତ ସା’ଙ୍କ ଠାରୁ ମିଳିଥିବା ସୂଚନା ଅନୁଯାୟୀ, ଗତ ୧୦ ତାରିଖ ସାଲହେଟିକ୍ରା ହାଇସ୍କୁଲର ୨ ଜଣ, ୧୧ ତାରିଖରେ ସାହାସପୁର ହାଇସ୍କୁଲର ୯ ଜଣ ଏବଂ ପାକେଲଖୋଲସ୍ଥିତ ହେମସାଗର ହାଇସ୍କୁଲର ୮ ଜଣ ଛାତ୍ରଛାତ୍ରୀ ପଜିଟିଭ ଚିହ୍ନଟ ହୋଇଛନ୍ତି । ବିଦ୍ୟାଳୟ ଆସିବା ପାଇଁ ସେମାନଙ୍କୁ ବାରଣ କରାଯିବା ସହ ଘରୋଇ ସଙ୍ଗରୋଧରେ ରହିବାକୁ ପରାମର୍ଶ ଦିଆଯାଇଛି । କରୋନା କଟକଣା ପାଇଁ ଶିକ୍ଷାନୁଷ୍ଠାନଗୁଡ଼ିକ ଦୀର୍ଘ ଦୀର୍ଘଦିନ ବନ୍ଦ ଥିଲା, ତେଣୁ ଖୋଲିବା ପରେ ଶିକ୍ଷକ, ଶିକ୍ଷୟିତ୍ରୀ, ଛାତ୍ରଛାତ୍ରୀ ତଥା ସମସ୍ତ ଅଣଶିକ୍ଷକ କର୍ମଚାରୀଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଉଛି । ଏବେ ଏହି ରିପୋର୍ଟ ଆସିବା ପରେ ଅଭିଭାବକ ମହଲରେ ଭାଳେଣି ପଡିଯାଇଛି ।