ଭୁବନେଶ୍ୱର : ସୋମବାର ଅର୍ଥାତ ଆଜି ଠାରୁ ପୁଣ୍ୟ ଓ ଧର୍ମର ମାସ କାର୍ତ୍ତିକ ମାସର ପ୍ରଥମ ସୋମବାର ଆରମ୍ଭ। ଏହି ମାସରେ ସମସ୍ତ ମନ୍ଦିରରେ ସ୍ୱତନ୍ତ୍ର ପୂଜାର୍ଚ୍ଚନା କରାଯାଇଥାଏ। ମନ୍ଦିର ମାନଙ୍କରେ ବିଶେଷ କରି ସମସ୍ତ ଶୈବ ପୀଠରେ ଶ୍ରଦ୍ଧାଳୁଙ୍କ ଭିଡ଼ ଜମିଥାଏ। ମାତ୍ର ଚଳିତ ବର୍ଷ କରୋନା କଟକଣା ପାଇଁ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ନାହିଁ। କେବଳ ପୂଜାରୀ ପ୍ରଭୁଙ୍କର ପୂଜାର୍ଚ୍ଚନା କରୁଛନ୍ତି।
ଓଡିଶାର ପ୍ରସିଦ୍ଧ ଶୈବ ପୀଠ, ଯେପରି ରାଜଧାନୀର ଲିଙ୍ଗରାଜ ମନ୍ଦିର, କପିଳାସ, ଆରଡି, ଧବଳେଶ୍ୱର, ଲୋକନାଥ, ଲଡୁବାବା, ଗୋରଖନାଥ ଭଳି ବିଭିନ୍ନ ଶୈବପୀଠରେ କରୋନା କଟକଣା ପାଇଁ କେବଳ ପୂଜାରୀଙ୍କ ଦ୍ୱାରା ପୂଜାର୍ଚ୍ଚନା କରାଯାଉଛି। ସାଧାରଣ ଦର୍ଶନ ଉପରେ କଟକଣା ଜାରି ରହିଛି।
ସେହିପରି କୋଭିଡ ନିୟମ ଅନୁଯାୟୀ ପୁରୀ ଶ୍ରୀମନ୍ଦିରରେ ମହାପ୍ରଭୁ ଜଗନ୍ନାଥଙ୍କ ସ୍ୱତନ୍ତ୍ର ନୀତି ଅନୁଷ୍ଠିତ ହେଉଥିଲେ ମଧ୍ୟ ସାଧାରଣ ଦର୍ଶନ ବନ୍ଦ ରହିଛି। ହବିଷ୍ୟାଳୀଙ୍କ ପାଇଁ ମଧ୍ୟ କୋଭିଡ ନିୟମ ଲାଗୁ କରାଯାଇଛି। ଏହାସହ ସ୍ଥାନୀୟଲୋକେ କେବଳ ବଡ ଦେଉଳ ସମ୍ମୁଖକୁ ଯାଇ ଦର୍ଶନ କରୁଛନ୍ତି।