ବାଲେଶ୍ୱର: ବାଲେଶ୍ବର ଜିଲ୍ଲା ସୋର ଥାନା ସାଉଡ଼ ଫାଣ୍ଡି ଅଧିନ ସାଉଡ଼ ଅଞ୍ଚଳରେ ଗତ ବିଳମ୍ବିତ ରାତିରେ ଡକାୟତଙ୍କ ଅଖିବୁଜା ଗୁୁଳିଚାଳନାରେ ୫ଜଣ ଗୁରୁତର ଆହାତ ହୋଇଥିବା ଜଣାପଡ଼ିଛି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି ହୋଇଛି। ମିଳିଥିବା ସୂଚନା ଅନୁସାରେ, ଗହଣା ବ୍ୟବସାୟୀ ସନାତନ କାମିଳାଙ୍କ ଘରେ କିଛି ଦୁର୍ବୃତ୍ତ ଗତକାଲି ବିଳମ୍ବିତ ରାତିରେ ଡକାୟତି ଉଦ୍ୟମ କରିଥିଲେ। ଏହି ସମୟରେ ସନାତନଙ୍କ ପଡ଼ୋଶୀ ଡକାୟତମାନଙ୍କୁ ବାଧା ଦେଇଥିଲେ। ଫଳରେ ଡକାୟତ ଓ ପଡ଼ୋଶୀଙ୍କ ମଧ୍ୟରେ ମୁହାଁମୁହିଁ ହୋଇଥିଲା।
ବ୍ୟବସାୟୀଙ୍କ ଘରୁ ଲୁଟେରାମାନେ ୨୫୦ ଗ୍ରାମ ସୁନା ଓ ୫କେଜିରୁ ଉର୍ଦ୍ଧ୍ବ ରୁପା ନେଇ ଫେରାର ହୋଇଯାଇଥିବା ବେଳେ ବାଇକ୍ ଓ ହେଲମେଟ୍ ଛାଡ଼ି ଚମ୍ପଟ ମାରିଥିବା ଜଣାପଡ଼ିଛି। ଏ ନେଇ ସୋର ଥାନାରେ ଅଭିଯୋଗ ହେବାପରେ ପୁଲିସ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛି।