ବ୍ରହ୍ମଗିରି: ପୁରୀ ଜିଲ୍ଲା ବ୍ରହ୍ମଗିରି ବ୍ଲକର ସଦର ଥାନା ଅନ୍ତର୍ଗତ ନିଶିଭଅଁର ଗାଁରେ କରୋନା ଆକ୍ରାନ୍ତ ଚିହ୍ନଟ ହେବା ପରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଓ ବୋମାମାଡ ଫଳରେ ୨ଜଣ ଆହତ ହୋଇଛନ୍ତି ।
ମିଳିଥିବା ସୂଚନା ଅନୁଯାୟୀ, ନିଶିଭଅଁର ଗାଁରେ ଗତକାଲି ଜଣେ ବ୍ୟକ୍ତି କରୋନା ପଜିଟିଭ ଚିହ୍ନଟ ହୋଇଥିଲେ । ପଜିଟିଭ ଚିହ୍ନଟ ହୋଇଥିବାରୁ ଉକ୍ତ ପରିବାରକୁ ଅପର ଗୋଷ୍ଠୀର କିଛି ବ୍ୟକ୍ତି ଆକ୍ଷେପ କରିବାରୁ ବିବାଦ ଆଜି ସକାଳୁ ଉଗ୍ର ରୂପ ନେଇଥିଲା । ଉଭୟଗୋଷ୍ଠୀ ପରସ୍ପର ଉପରକୁ ବୋମା ମାଡ କରିଥିବା ଜଣାଯାଇଛି । ପୂବରୁ ଉଭୟ ଗୋଷ୍ଠୀ ମଧ୍ୟରେ ଶତ୍ରୁତା ଲାଗି ରହିଥିଲା । ତେବେ ଆଜି ସକାଳୁ ଦୁଇ ଗୋଷ୍ଠୀ ମଧ୍ୟରେ ୫୦ ରୁ ଅଧିକ ବୋମା ମାଡ ଉଭୟ ପକ୍ଷରୁ ହୋଇଥିଲା । ଏହି ବୋମା ମାଡରେ ଦୁଇଜଣ ଗୁରୁତର ଆହତ ହୋଇ ରେବଣା ନୂଆଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି । ଗତକାଲି ବିଳମ୍ବିତ ରାତିରେ ଉଭୟ ଗୋଷ୍ଠୀ ମୁହାଁମୁହିଁ ହୋଇଥିଲେ । ଉଭୟଙ୍କ ଭିତରେ ଟେକା ପଥର ମାଡ ହୋଇଥିଲା । ପରିସ୍ଥିତିକୁ ନିୟନ୍ତ୍ରଣ କରିବାଲାଗି ଗ୍ରାମରେ ସଶସ୍ତ୍ରପୋଲିସ ବାହୀନି ମୁତୟନ କରାଯାଇଛି । ଅନ୍ୟପକ୍ଷରେ ଗ୍ରାମଟି ଏବେ ପୁରୁଷ ଶୂନ୍ୟ ହୋଇପଡିଛି ।