ବାଲେଶ୍ୱର: ବନ ବିଭାଗ ପକ୍ଷରୁ ଚାନ୍ଦିପୁର ରେଞ୍ଜ ଅଫିସର ସୁକୁମାର ଦାସଙ୍କ ନେତୃତ୍ୱରେ ଆଜି ଚଢ଼ଉ ହୋଇ କେନ୍ଦୁପତ୍ର ଭର୍ତ୍ତି ଏକ ଟ୍ରକ୍ ଜବତ୍ କରାଯାଇଛି । ବିଶ୍ୱସ୍ତ ସୂତ୍ରରୁ ଖବର ପାଇ ଡିଏଫଓ ବିଶ୍ୱରାଜ ପଣ୍ଡାଙ୍କ ନିର୍ଦ୍ଦେଶ କ୍ରମେ ବନ ବିଭାଗର ଟିମ୍ ଏହି ଚଢ଼ଉ କରିଥିଲା । ୬୦ନଂ ଜାତୀୟ ରାଜପଥର ଫୁଲାଡ଼ିଛକଠାରେ ଗତ କାଲି ରାତି ପ୍ରାୟ ୧୨ଟା ୩୦ ବେଳେ ଓଆର୧୫ଏଲ/୬୬୫୫ନଂର ଟ୍ରକ୍କୁ ବନ ବିଭାଗ ଟିମ୍ ଅଟକାଇ ଯାଞ୍ଚ କରିବା ପରେ ଏଥିରେ କେନ୍ଦୁପତ୍ର ଥିବା ଜଣାପଡ଼ିଥିଲା । ପ୍ରାୟ ୩୦ କ୍ୱିଣ୍ଟାଲ କେନ୍ଦୁପତ୍ର ଥିବା ଜଣାପଡ଼ିବା ପରେ ଏହି ଟ୍ରକକୁ ବନବିଭାଗ କାର୍ଯ୍ୟାଳୟକୁ ଆଣାଯାଇଥିଲା । ତେବେ ଗାଡ଼ି ଯାଞ୍ଚ ସମୟରେ ଡ୍ରାଇଭର ଓ ହେଲପର ଫୁଲାଡ଼ି ଛକରୁ କୁଆଡେ଼ ଫେରାର ହୋଇଯାଇଥିବା ଜଣାପଡ଼ିଛି । ଏନେଇ ବନ ବିଭାଗ ପକ୍ଷରୁ ୨୬/୨୦୨୦-୨୧ ନଂର ଏକ ମାମଲା ରୁଜୁ ସହ ତଦନ୍ତ ଜାରି ରହିଛି । ଏହି ଚଢ଼ଉରେ ଫରେଷ୍ଟର ବିବେକାନନ୍ଦ ଜେନା, ଫରେଷ୍ଟ ଗାଡର଼୍ ଶଶାଙ୍କ ଜେନା, ଶଶିଧର ମହାନ୍ତି, ସତ୍ୟବ୍ରତ ମଣ୍ଡଳ, ଗୌତମ ଜେନା, ଅର୍ଜୁନ କୁମାର ମଲ୍ଲିକ ପ୍ରମୁଖ ସାମିଲ ହୋଇଥିଲେ ।