ଯୋଡା: ଜିନ୍ଦଲ ଷ୍ଟିଲ ଆଣ୍ଡ ପାୱାର ଲିମିଟେଡ (ଜେଏସପିଏଲ) ବଡବିଲ ତରଫରୁ ଜିନ୍ଦଲ ଗ୍ରୁପର ପ୍ରତିଷ୍ଠାତା ସ୍ୱର୍ଗତଃ ଶ୍ରୀ ଓମ ପ୍ରକାଶ ଜିନ୍ଦଲଙ୍କ ୯୦ ତମ ଜନ୍ମ ବାର୍ଷିକୀ ଶୁକ୍ରବାର ପାଳିତ ହୋଇଯାଇଛି । ଏହି ଦିନଟିକୁ ସ୍ମରଣୀୟ କରିବା ନିମନ୍ତେ ପ୍ରତିଷ୍ଠା ଦିବସ ରୂପେ ପାଳନ କରାଯାଉଥିବାରୁ ବଡବିଲ ପ୍ଲାଣ୍ଟ ଏବଂ ଜିନ୍ଦଲ ସ୍କୁଲରେ ବିଭିନ୍ନ ପ୍ରକାର ଆୟୋଜନ କରାଯାଇଥିଲା । ପ୍ଲାଣ୍ଟ ପରିସରରେ ୟୁନିଟ ମୁଖ୍ୟ ସୁରେଶା ଜୀଙ୍କ ସମେତ ବହୁ ଉଚ୍ଚ ପଦସ୍ଥ ଅଧିକାରୀ ଏବଂ କର୍ମଚାରୀ ମାନେ ସ୍ୱର୍ଗତଃ ଜିନ୍ଦଲଙ୍କ ତୈଳଚିତ୍ରରେ ପୁଷ୍ପମାଲ୍ୟ ଅର୍ପଣ କରିଥିଲେ ।
ଶ୍ରୀ ସୁରେଶା ତାଙ୍କ ସମ୍ଭାଷଣରେ କହିଲେ ଜଣେ ସଫଳ ଉଦ୍ୟୋଗୀ ଏବଂ ପଥ ପ୍ରଦର୍ଶକ ଭାବରେ ଶ୍ରୀ ଜିନ୍ଦଲ ସବୁଦିନ ସମସ୍ତଙ୍କ ଠାରେ ମନେ ରହିବେ । ସେ ଜୀବନରେ ସବୁ କ୍ଷେତ୍ରରେ ସଫଳତା ହାସଲ କରିଥିବାରୁ ତାଙ୍କ ଚଲାପଥ ଆମ ସମସ୍ତଙ୍କ ପାଇଁ ପ୍ରେରମାର ଉତ୍ସ । ଏହା ପୂର୍ବରୁ ପୂର୍ବାହ୍ନରେ ପ୍ଲାଣ୍ଟ ପରିସରରେ ଥିବା ଶ୍ରମିକ ବିହାରରେ ହୋମ ଏବଂ ଯଜ୍ଞର ଆୟୋଜନ କରାଯାଇଥିଲା । ଏହି ପୂଜାର୍ଚ୍ଚନାରେ ପ୍ରାୟ ତିନିଶହରୁ ଅଧିକ କର୍ମଚାରୀ ଏବଂ ଶ୍ରମିକ ମାନେ ଯୋଗଦେଇ ଶ୍ରୀ ଜିନ୍ଦଲଙ୍କ ଉଦେଶ୍ୟରେ ଶ୍ରଦ୍ଧାସୁମନ ଅର୍ପଣ କରିଥିଲେ । ଜିନ୍ଦଲ ସ୍କୁଲର ଛାତ୍ରଛାତ୍ରୀ ମାନେ ଏକ ଅଭିନବ ଢଙ୍ଗରେ ଏହି ଦିନଟିକୁ ପାଳନ କରିଥିଲେ । ସେମାନେ ଶାସ୍ତ୍ରୀୟ ନୃତ୍ୟ ସହ ଶ୍ରୀ ଜିନ୍ଦଲଙ୍କ ଉଦେଶ୍ୟରେ ଆତ୍ମଲିଖିତ କବିତା ଇଣ୍ଟରନେଟ ମାଧ୍ୟମରେ ମୋବାଇଲ ଦ୍ୱାରା ପରିବେଷଣ କରିଥିଲେ । ଏହି ଅବସରରେ ଅନ୍ୟମାନଙ୍କ ସହ ପେଲେଟ ପ୍ଲାଣ୍ଟର ବାଣିଜ୍ୟ ବିଭାଗ ମୁଖ୍ୟ ସୁଶୀଲ ଅଗ୍ରୱାଲ,ମାନବ ସମ୍ବଳ ମୁଖ୍ୟ ଶରତ କୁମାର ପଣ୍ଡା, ସିଏସଆର ମୁଖ୍ୟ ଭର୍ଜିଲ ଲାକ୍ରା ଏବଂ ଜିନ୍ଦଲ ସ୍କୁଲର ଅଧ୍ୟକ୍ଷା ସଙ୍ଗୀତାରାଣୀ ଦାସ ପ୍ରମୁଖ ଉପସ୍ଥିତ ଥିଲେ ।