ନାବାଳିକାକୁ ଗଣଦୁଷ୍କର୍ମ : ୩ ଗିରଫ
କନ୍ଧମାଳ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅଂଚଳରେ ଜଣେ ନାବାଳିକା ବାହାଘର ଦେଖି ଫେରିବାବେଳେ ତାକୁ ବାଇକରେ ଅପହରଣ କରି ତା ସହିତ ଗଣ ଦୁଷ୍କର୍ମ କରିଥିବା ଅଭିଯୋଗରେ ଫିରିଙ୍ଗିଆ ଥାନା ପୋଲିସ ଆଜି ୩ ଜଣ ଅଭିଯୁକ୍ତଙ୍କୁ ଗିରଫ କରିଛି । ସୂଚନା ଅନୁସାରେ ଗତ ୨୮/୦୪/୨୦୨୧ ତାରିଖରେ ପୀଡିତା ନାବାଳିକା ଜଣକ ବାହାଘର ଦେଖି ଘରକୁ ଫେରୁଥିବାବେଳେ ଫିରିଙ୍ଗିଆ ଥାନା ଅଂଚଳର ଜାଇଲାମ୍ବାର ସୁକାନ୍ତ କହଁର ଏବଂ ବେହେଙ୍ଗିଆ ଗାଁର ସରୋଜ କହଁର ଓ ମହେଶ୍ୱର କହଁର ଏକ ବାଇକରେ ନାବାଳିକାକୁ ଅପହରଣ କରି ଭୃଙ୍ଗିଜୋଡି ଗାଁର ନିକଟରେ ଥିବା ଏକ ଜଙ୍ଗଲକୁ ନେଇଯାଇ ସେଠାରେ ନାବାଳିକା ସହିତ ଜଣକପରେ ଜଣେ ଦୁଷ୍କର୍ମ କରିଥିଲେ । କିଛି ସମୟପରେ ସେଠାରେ ଆଉ ଜଣେ ପହଂଚି ସେ ମଧ୍ୟ ନାବାଳିକା ସହିତ ଦୁଷ୍କର୍ମ କରିଥିଲା । ଏହାପରେ ସେମାନେ ନାବାଳିକାକୁ ଆହତ ଏବଂ ଅସହାୟ ଅବସ୍ଥାରେ ଛାଡି ଯାଇଥିଲେ । ପୀଡିତା ଜଣକ ଯେକୌଣସି ପ୍ରକାରେ ନିଜ ଘରକୁ ଯାଇ ପରିବାର ଲୋକଙ୍କୁ ସବୁ କହିଥିଲା । ପୀଡିତା ବାପା ୩୦ ତାରିଖ ଦିନ ଫିରିଙ୍ଗିଆ ଥାନାରେ ଏହି ସଂକ୍ରାନ୍ତରେ ଏକ ଅଭିଯୋଗ କରିଥିଲେ । ଫିରିଙ୍ଗିଆ ଥାନା ପୋଲିସ ଏକ ମାମଲା ୫୩/୨୧ ରୁଜ୍ଜୁ କରି ଅଭିଯୁକ୍ତମାନଙ୍କୁ ଖୋଜାଖୋଜି କରିବା ଆରମ୍ଭ କରିଥିଲା । ଶନିବାର ପୋଲିସ ଅଭିଯୁକ୍ତ ସରୋଜ କହଁର, ମହେଶ୍ୱର କହଁର ଏବଂ ସୁକାନ୍ତ କହଁରକୁ ଗିରଫ କରି ଆଜି ସେମାନଙ୍କୁ କୋର୍ଟ ଚାଲାଣ କରିଥିବା ନେଇ ଫିରିଙ୍ଗିଆ ଥାନା ଅଧିକାରୀ ପି.ଶ୍ୟାମସୁନ୍ଦର ରାଓ କହଛନ୍ତି ।