ଭୁବନେଶ୍ୱର,୧ ।୦୬(ନି.ପ୍ର.): କୌଣସି ପୂର୍ବ ପ୍ରସ୍ତୁତି ବିନା ଦେଶରେ ଦୁଇ ମାସରୁ ଉର୍ଦ୍ଧ୍ୱ ସମୟ ଧରି ଲକ୍ଡାଉନ୍ ଲାଗୁ କରି ସରକାର ଦେଶର ତଥା କୋଟିକୋଟି ଶ୍ରମଜୀବୀଙ୍କର ଜୀବନ ଦୂର୍ବୀସହ କରିଦେଇଛନ୍ତି । ଦେଶର ବିଭିନ୍ନ ପ୍ରାନ୍ତରେ କାମ କରୁଥିବା ଶ୍ରମଜୀବୀମାନେ ରୋଜଗାର ହରାଇବା ସହ ଭୋକ ଶୋଷରେ କୌଣସି ସରକାରୀ ସହାୟତା ବିନା ପାଦରେ ଚାଲି ଚାଲି, ସାଇକେଲ ବା ଟ୍ରକ ଡାଲାରେ ବିପଦଶଙ୍କୁଳ ଭାବେ ହଜାର ହଜାର କିଲୋମିଟର ଅତିକ୍ରମ କରୁଛନ୍ତି । ମୁଖ୍ୟମନ୍ତ୍ରୀ, ପୋଲିସ ମହାନିର୍ଦେଶ କ, ପ୍ରଧାନମନ୍ତ୍ରୀ ତଥା ସୁପ୍ରିମକୋର୍ଟଙ୍କ “କେହି ଭୋକ ପେଟରେ ଚାଲିବେ ବା ସାଇକେଲରେ ଯିବେ ନାହିଁ’ ନିର୍ଦେଶ ଥିବା ସତ୍ୱେ ବାସ୍ତବତା ହେଉଛି ଆଜି ବି ହଜାର ହଜାର ଲୋକେ ଦେଶର ଏ କୋଣରୁ ସେ କୋଣ ଯାଏ ଚାଲିବାରେ ଲଗିଛନ୍ତି । ଶ୍ରମିକ ସ୍ପେଶାଲ ଟ୍ରେନସବୁ ଦିଗହରା ହୋଇଛନ୍ତି । ଶ୍ରମଜୀବୀଙ୍କର ଏହି ବିପଦ ସମୟରେ ଓଡ଼ିଶା ସମେତ ବିଭିନ୍ନ ସରକାରମାନେ ଦିନକର ଶ୍ରମ ଅବଧି ୮ ଘଣ୍ଟାରୁ ୧୨ ଘଣ୍ଟାକୁ ବଢ଼ାଇ ଦେଇଛନ୍ତି । ସରକାରମାନଙ୍କର ଏହି ଅମାନବୀୟ କାର୍ଯ୍ୟକଳାପକୁ ବିରୋଧ କରି ଉତ୍କଳ ଗାନ୍ଧୀ ସ୍ମାରକ ନିଧି, ଗାନ୍ଧୀ ଶାନ୍ତି ପ୍ରତିଷ୍ଠାନ, ରାଷ୍ଟ୍ରୀୟ ଯୁବା ସଙ୍ଗଠନ, ଉତ୍କଳ ଖଦି ମଣ୍ଡଳ, କସ୍ତୁରବା ଗାନ୍ଧୀ ରାଷ୍ଟ୍ରୀୟ ସ୍ମାରକ ଟ୍ରଷ୍ଟ, ସର୍ବୋଦୟ, ଲୋହିଆ ଏକାଡେମୀ, ଗଣତାନ୍ତ୍ରିକ ଅଧିକାର ସୁରକ୍ଷା ସଂଗଠନ ଆଦି ଗାନ୍ଧୀ ବିଚାରର ସଂଗଠନମାନଙ୍କ ପକ୍ଷରୁ ଭୁବନେଶ୍ୱରରୁ କଟକ ପର୍ଯ୍ୟନ୍ତ ଏକ ପଦଯାତ୍ରା ଆୟୋଜନ କରାହୋଇଛି । ଆମ ରାଜ୍ୟ ତଥା ରାଜ୍ୟ ବାହାରର ଯେଉଁ ମଣିଷ ଓଡ଼ିଶା ମଧ୍ୟ ଦେଇ ଯାଉଛନ୍ତି, ସରକାର ନିଜ ବାକ୍ୟ ରକ୍ଷା କରି ତୁରନ୍ତ ବିଭିନ୍ନ ସ୍ଥାନରେ ମାଗଣା ଖାଦ୍ୟର ବ୍ୟବସ୍ଥା କରିବା ସହ ଗାଡିର ବ୍ୟବସ୍ଥା କରିବାକୁ ସଂଗଠନମାନଙ୍କ ପକ୍ଷରୁ ଦାବି କରାହୋଇଛି । ଶ୍ରମ ଦିବସର ଅବଧି ପୁର୍ବପରି ଆଠ ଘଂଟାକୁ କମାଇବା, ରାଜ୍ୟକୁ ଫେରି ଆସିଥିବା ଶ୍ରମିକମାନଙ୍କ ପାଇଁ ଗାଁ ଗାଁରେ ଗ୍ରାମସ୍ୱରାଜ୍ୟ ଭିତିରେ କାମ ସୃଷ୍ଟି କରିବା ପ୍ରଭୃତି ଦାବି କରାହୋଇଛି । ଏହି ପଦଯାତ୍ରାରେ ଡ଼ାଃ ବିଶ୍ୱଜିତ, ଶୈଳଜ ରବି, ବୈଷ୍ଣବ ଦାସ, ଦେବ ପ୍ରସାଦ ରାୟ, ସନ୍ଧ୍ୟାରାଣୀ ମଲ୍ଲିକ, ଦେବରଞ୍ଜନ, ବିରୂପାକ୍ଷ ତ୍ରିପାଠୀ, ସୁଶାନ୍ତ କୁମାର ମହାନ୍ତି ପ୍ରମୁଖ ଭୁବନେଶ୍ୱରର ବାଣୀବିହାରଠାରୁ କଟକ ପର୍ଯ୍ୟନ୍ତ ସାମିଲ ହୋଇଥିଲେ । ଏହି ପଦଯାତ୍ରୀମାନଙ୍କୁ ସମର୍ଥନ କରି ବରିଷ୍ଠ ସାମ୍ବାଦିକ ରବି ଦାସ, ପୂର୍ବତନ ବିଧାୟକ ରାଧାକାନ୍ତ ସେଠୀ,ଶ୍ରମିକ ନେତା ରାମକୃଷ୍ଣ ପଣ୍ଡା, ଚାଷୀ ନେତା ସୁରେଶ ପାଣିଗ୍ରାହୀ, ସ୍ତମ୍ଭକାର ସତୀଶ ମିଶ୍ର, ସାମାଜିକ କର୍ମୀ ସୌମ୍ୟରଞ୍ଜନ ରାଉତରାୟ ପ୍ରମୁଖ ସାମିଲ ହୋଇଥିଲେ ।