- ପର୍ଯ୍ୟଟନ ମାନଚିତ୍ରରେ କେବେ ପାଇବ ସ୍ଥାନ
- ମୁହଁ ଫେରାଇବାକୁ ବସିଲେଣି ପର୍ଯ୍ୟଟକ
ଗୋଲାମୁଣ୍ଡା: କଳାହାଣ୍ଡି ଜିଲ୍ଲାରେ ଶୀତ ଋତୁ ଆସିଲେ ପର୍ଯ୍ୟଟନସ୍ଥଳି ମାନଙ୍କ ରେ ପର୍ଯ୍ୟଟକ ମାନଙ୍କ ଭିଡ଼ ଦେଖିବାକୁ ମିଳିଥାଏ । ଗୋଲାମୁଣ୍ଡା ବ୍ଲକରେ ଅନେକ ପର୍ଯ୍ୟଟନ ସ୍ଥଳି ଥିଲେ ମଧ୍ୟ ପର୍ଯ୍ୟଟନ ସ୍ଥଳି ମଧ୍ୟରେ କରଞ୍ଜକୋଟ ଡ୍ୟାମ ଅନ୍ୟତମ ଅଟେ । କରଞ୍ଜକୋଟ ଠାରେ ପାହାଡ଼, ଝରଣା, ମନ୍ଦିର ଡ୍ୟାମ ଠାରୁ କାହିଁରୁ କେତେ ସୁନ୍ଦର ବନାନି ଅଛି । ଏଠାକୁ ଆସି ପର୍ଯ୍ୟଟକ ମାନେ ବିମୋହିତ ହୋଇଥାନ୍ତି । ହେଲେ ପର୍ଯ୍ୟଟନ ବିଭାଗର ଅବହେଳା ଓ ଜନ ପ୍ରତିନିଧିଙ୍କ ଆନ୍ତରିକତାର ଅଭାଵ ଯୋଗୁଁ ଭିତ୍ତିଭୂମି ଥାଇ ବି ଅବହେଳିତ ଅବସ୍ଥାରେ ପଡି ରହିଛି । ଗୋଲାମୁଣ୍ଡା ବ୍ଲକ ଅନ୍ତର୍ଗତ ନୁଆଁ ଗାଁ ପଞ୍ଚାୟତ ରେ ଅବସ୍ଥିତ ଅଛି କରଞ୍ଜକୋଟ ଡ୍ୟାମ । ଏହି ଡ୍ୟାମ ୧୯୭୫ ମସିହାରେ ନିର୍ମାଣ ହୋଇଥିଲା । କରଞ୍ଜକୋଟ ଡ୍ୟାମ ୪୨ ହେକ୍ଟର ଜମିରେ ଅବସ୍ଥିତ ହୋଇଛି । ଏହି ଡ୍ୟାମ ଯୋଗୁଁ ନୁଆଁଗାଁ, କେଗାଁ, ସିନାପାଲି ପଞ୍ଚାୟତର ଚାଷୀମାନେ ଧାନ ଉତ୍ପାଦନ କରିଥାନ୍ତି । ଏହି ଡ୍ୟାମ ଚତୃପାର୍ଶ୍ଵରେ ପାହାଡ଼, ଝରଣା ରହିଥିବା ବେଳେ ଡ୍ୟାମ କୁ ଲାଗିକି ଏକ ଶିବ ମନ୍ଦିର ଅବସ୍ଥିତ ଅଛି । କରଞ୍ଜକୋଟ ଡ୍ୟାମ ଅଞ୍ଚଳକୁ ଶୀତ ଋତୁର ଆଗମନ ରେ ଅନେକ ପର୍ଯ୍ୟଟକ ଆସିଥାନ୍ତି । କେଉଁମାନେ ଭୋଜି କରି ମଜା ନେଇଥାନ୍ତି ତ ଆଉ କିଏ ଫଟୋ,ଭିଡିଓ ଉଠାଇ ମଉଜ ମଜଲିସ କରିଥାନ୍ତି । ପର୍ଯ୍ୟଟକ ଆସନ୍ତି ଦେଖନ୍ତି ଆଉ ମୁହଁ ଫେରାଇ ଚାଲି ଯାଆନ୍ତି । ବର୍ତ୍ତମାନ ସମସ୍ତ ପ୍ରକାର ଭିତ୍ତିଭୂମି ଥାଇ ମଧ୍ୟ ପର୍ଯ୍ୟନ୍ତ ମାନଚିତ୍ରରେ ସ୍ଥାନ ପାଇପାରୁନାହିଁ । କରଞ୍ଜକୋଟକୁ ପର୍ଯ୍ୟଟନ ମାନ୍ୟତା ଦାବୀ ନେଇ ଅନେକ ଥର ଅଞ୍ଚଳବାସୀ ଅନେକ ଦିନରୁ ଦାବୀ କରି ଆସୁଥିଲେ ସୁଦ୍ଧା ଆଜି ପର୍ଯ୍ୟନ୍ତ ଅଞ୍ଚଳବାସୀଙ୍କ ଦାବୀକୁ ଅଣଦେଖା କରାଯାଉଛି । ଯଦି କରଞ୍ଜକୋଟ କୁ ପର୍ଯ୍ୟଟନର ମାନ୍ୟତା ପ୍ରଦାନ କଲେ, ଏ ଅଞ୍ଚଳର ଉନ୍ନତି ହେବା ସହିତ ଲୋକଙ୍କ ମଧ୍ୟ ଆର୍ଥିକ ବିକାଶ ହୋଇପାରନ୍ତା ।