ଭାପୁର,୧୧.୬(ନି.ପ୍ର.): ମହାନଦୀ ଗର୍ଭରେ ବୁଡି ରହିଥିବା ଏକ ମନ୍ଦିରର ଦଧିନଉତି ଆବିଷ୍କୃତ ହୋଇଛି । ଐତିହାସିକ ଅନୀଲ ଧୀରଙ୍କ ନେତୃତ୍ୱରେ ଭାରତୀୟ କଳା ଓ ସଂସ୍କୃତ ଐତିହ୍ୟ ନ୍ୟାସ (ଇନଟାକ) ପକ୍ଷରୁ ମହାନଦୀ ଅବବାହିକା ଐତିହ୍ୟସ୍ଥଳ ପ୍ରଲେଖନ ପ୍ରକଳ୍ପ କାର୍ଯ୍ୟ ବେଳେ ନୟାଗଡ଼ ଜିଲ୍ଲା ଭାପୁର ବ୍ଲକ ପଦ୍ମାବତୀ ଗ୍ରାମ ନିକଟସ୍ଥ ମହାନଦୀ ଗର୍ଭରେ ବୁଡ଼ି ରହିଥିବା ୫୦୦ ବର୍ଷ ପୁରୁଣା ଗୋପୀନାଥ ମନ୍ଦିର ଚୂଡ଼ା ଠାବ ହୋଇଛି । ମଝିରେ ମଝିରେ ଏହି ମନ୍ଦିର ମହାନଦୀରୁ ଫୁଟି ବାହାରିଥିବା ସୂଚନା ମିଳିଛି । ନଦୀଗର୍ଭରେ ଲୀନ ସାତପାଟଣା ୭ଟି ଗ୍ରାମକୁ ନେଇ ଗଠିତ ଜନପଦର ଏକ ଅଂଶ ଓ ତାହା ପୂର୍ବେ ପଦ୍ମାବତୀ ଗ୍ରାମ ଅନ୍ତର୍ଭୁକ୍ତ ରହିଥିଲା । ମହାନଦୀର ଗତିପଥ ବଦଳ ଓ କୂଳ ଲଘଂନ ସାଙ୍ଗକୁ ଉନବିଂଶ ଶତାଦ୍ଧୀରେ ପ୍ରାୟ ୧୮୦୧ରୁ ୧୯୦୦ ମଧ୍ୟରେ ପଦ୍ମାବତୀର ଅନ୍ୟ ୬ଟି ପଡ଼ାରେ ଥିବା ମନ୍ଦିରଗୁଡ଼ିକ ସମ୍ପୂର୍ଣ୍ଣ ଭାବେ ନଦୀ ଭିତରେ ଲୀନ ହୋଇଯାଇଛି । ଲୋକମାନେ ଗ୍ରାମ ଛାଡ଼ି ସୁରକ୍ଷିତ ସ୍ଥାନରେ ପୁଣି ନୂଆ ଗ୍ରାମ ବସାଇଛନ୍ତି । ବର୍ତମାନ ପଦ୍ମାବତୀ ଗ୍ରାମରେ ଥିବା ଗୋପୀନାଥ ଦେବ ମନ୍ଦିରର ଈଶ୍ୱର ପ୍ରତିମା’ ବୁଡ଼ିଯାଇଥିବା ମନ୍ଦିରର ମୂଳ ପ୍ରତିମା ବୋଲି କୁହାଯାଉଛି । ଗ୍ରାମବାସୀଙ୍କ କହିବା ମୁତାବକ ମହାନଦୀ ବାଲି ଭିତରେ ଏପରି ପ୍ରାୟ ୭ଟି ମନ୍ଦିର ବୁଡ଼ି ରହିଛି । ଏମାନଙ୍କ ମଧ୍ୟରେ ସବୁଠାରୁ ଡେଙ୍ଗା ମନ୍ଦିର ଗୋପୀନାଥ ଦେବଙ୍କ ମନ୍ଦିରର ଚୂଡ଼ା କିଛି ବର୍ଷଯାଏଁ ପାଣି ଭିତରୁ ଉପରକୁ ଉଠି ରହିଥିବା ବେଳେ ପରେ ତଳକୁ ଖସି ଯାଇଥିଲା । ଶେଷ ପାଇଁ ୧୧ବର୍ଷ ତଳେ ମନ୍ଦିର ଚୂଡ଼ା ଦେଖିବାକୁ ମିଳିଥିଲା । ତେବେ ଗତବର୍ଷ ପାଣି ସ୍ତର କମ ଥିବାବେଳେ ମନ୍ଦିର ଦୃଶ୍ୟମାନ ହୋଇଥିଲା । ମନ୍ଦିରଟି ପଂଚଦଶ-ଷୋଡ଼ଶ ଶତାବ୍ଦୀ ବେଳର ବୋଲି ଅନୁମାନ କରାଯାଉଛି । ସୂଚନାଯୋଗ୍ୟ ଯେ, ୧୯୩୩ ମସିହାର ଐତିହ୍ୟ ସମ୍ପନ୍ନ ପଦ୍ମାବତୀ ଗ୍ରାମ ମହାନଦୀ ଗର୍ଭରେ ସମ୍ପୂର୍ଣ୍ଣ ଲୀନ ହୋଇଥିଲା । ତେଣୁ ମହାନଦୀ ଗର୍ଭରେ ଗୋପୀନାଥ ମନ୍ଦିର, ରାସବିହାରୀ ମନ୍ଦିର, ମଙ୍ଗଳା ମନ୍ଦିର, ମଙ୍ଗଳା ମନ୍ଦିର ପ୍ରଭୃତି ୭ଟି ମନ୍ଦିର ବାଲିଚର ହୋଇଥିବା ସଂସ୍କୃତି ଭବେଷକ ଡ଼.ପବିତ୍ର କୁମାର ସୁବୁଦ୍ଧି ପ୍ରକାଶ କରିଥିଲା ବେଳେ ଏହାକୁ ନେଇ ଅଧିକ ଗବେଷଣା ଜାରି ରହିଛି ।