ଆଠଗଡ଼: ଯୁବତୀଙ୍କୁ ଅପହରଣ ପରେ ଦୁଷ୍କର୍ମ କରିବା ଭଳି ଏକ ଚାଂଚଲ୍ୟକର ଘଟଣା ଘଟିଛି ଆଠଗଡ଼ ଅଂଚଳରେ । ଆଠଗଡ଼ ଏନ୍ଏସି ଅନ୍ତର୍ଗତ କନ୍ତୋଲ ୧୭ ନମ୍ବର ୱାର୍ଡର ଏହି ଯୁବତୀଙ୍କୁ ଆଠଗଡ଼ ଥାନା ପୋଲିସ ଚୌଦ୍ୱାରାରୁ ଉଦ୍ଧାର କରିଛି । ଚୌଦ୍ୱାରା ଆଗ୍ରାହାଟ ଅଂଚଳରେ ଯୁବତୀଙ୍କୁ ଏକ ବନ୍ଦ ଘରେ ରଖି ୫ ଦିନ ଏଭଳି ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଏହି ଘଟଣାରେ ଅଭିଯୁକ୍ତ ଯୁବକକୁ ଥାନାରେ ଅଟକ ରଖି ପୋଲିସ ଜେରା କରୁଛି । ପୋଲିସ ସୂତ୍ରରୁ ପ୍ରକାଶ ଯେ, ଗତ ୧୮ ତାରଖ ରାତିରୁ ଯୁବତୀ ଜଣକ ନିଖୋଜ ହୋଇଥବବା ସମ୍ପର୍କରେ ତାଙ୍କ ମା’ ଆଠଗଡ଼ ଥାନାରେ ଅଭିଯୋଗ କରିଥିଲେ । ପୋଲିସ ଘଟଣା ତଦନ୍ତ କରି ଯୁବତୀଜଣକ ଚୌଦ୍ୱାରା ଆଗ୍ରାହାଟ ଅଂଚଳରେ ଥିବା ସଂପର୍କରେ ସୂଚନା ପାଇଥିଲା । ଏ ସମ୍ପର୍କରେ ଯୁବତୀ ଜଣକ ଆଠଗଡ଼ ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଅନୁସାରେ, ଗତ ୧୮ ତାରିଖ ମଧ୍ୟରାତ୍ରିରେ ୨୯ ବର୍ଷ ବୟସ୍କା ଏହି ଅବିବାହିତା ଯୁବତୀଜଣକ ନିଦରୁ ଉଠି ପରିସ୍ରା କରିବାକୁ ଯାଉଥିବା ବେଳେ କନ୍ତୋଲ ଗ୍ରାମର ସଞ୍ଜୟ ବାରିକ ତାଙ୍କ ମୁହଁରେ ଏକ କପଡା ଲଗାଇ ଅଚେତ କରି ଦେଇଥିଲା । ପରଦିନ ସକାଳେ ଯୁବତୀଜଣକ ଏକ ବନ୍ଦ କୋଠରୀରେ ଥିବା ଜାଣିବାକୁ ପାଇଥିଲେ । ଆଠଗଡ଼ ଥାନାର ସବ୍ଇନ୍ସପେକ୍ଟ ସର୍ବେଶ୍ୱର ନାୟକ ଓ ସବ୍ଇନ୍ସପେକ୍ଟର ଶକୁନ୍ତଳା ଦାସଙ୍କ ନେତୃତ୍ୱରେ ଆଠଗଡ଼ ଓ ଚୌଦ୍ୱାର ପୋଲିସ କର୍ମଚାରୀମାନେ ଏହି ଚଢ଼ଉରେ ସାମିଲ ହୋଇଥିଲେ ।