ଭୁବନେଶ୍ବର: କ୍ରୀଡ଼ା ପ୍ରୋତ୍ସାହନରେ ଓଡ଼ିଶା ଯେ ଦେଶର ଏକ ନମ୍ବର ରାଜ୍ୟ। ଏକଥା ପୁଣି ଥରେ ପ୍ରମାଣିତ ହୋଇଛି। ଦୁଇ ବର୍ଷ ତଳେ ହକି ଇଣ୍ଡିଆ ସହ ପାଞ୍ଚ ବର୍ଷିୟା ଚୁକ୍ତି କରି କୌଣସି ଖେଳର ପ୍ରାୟୋଜକ ହେବାରେ ପ୍ରଥମ ରାଜ୍ୟ ପାଲଟିଥିଲା ଓଡ଼ିଶା। ଏବେ ଶକ୍ତି, ସାମର୍ଥ୍ୟ ଓ ସାହସର ଖେଳ ରଗ୍ବି ବିକାଶର ଗୁରୁ ଦାୟିତ୍ବ ଓଡ଼ିଶା ସରକାର ଗ୍ରହଣ କରିଛନ୍ତି। ହକି ପରେ ଦ୍ବିତୀୟ ଖେଳ ଭାବେ ରଗ୍ବିର ପ୍ରାୟୋଜକ ହୋଇଛି ଓଡ଼ିଶା। ତା’ ସହ ଭାରତୀୟ କ୍ରୀଡ଼ା ଇତିହାସରେ ଆଉ ଏକ ନବୀନ ଫର୍ଦ ଯୋଡ଼ି ହୋଇଛି। ଫଳରେ ରଗ୍ବି ଖେଳର ପ୍ରଚାର, ପ୍ରସାର ସହ ପ୍ରତିଭା ଚିହ୍ନଟ, ପ୍ରଶିକ୍ଷଣ ଓ ଖେଳାଳି ଗଢ଼ିବାରେ ଓଡ଼ିଶା ଦେଶର ପ୍ରମୁଖ ପେଣ୍ଠସ୍ଥଳୀ ପାଲଟିବାକୁ ଯାଉଛି।
ଆଗାମୀ ତିନି ବର୍ଷ ଯାଏଁ ଓଡ଼ିଶା ସରକାର ଜାତୀୟ ରଗ୍ବି ଦଳର ମୁଖ୍ୟ ପୃଷ୍ଠପୋଷକ ଓ ପ୍ରାୟୋଜକ ରହିବେ। ଉଭୟ ଭାରତୀୟ ମହିଳା ଓ ପୁରୁଷ ରଗ୍ବି ଦଳର ଅନ୍ତର୍ଜାତୀୟ ଅଂଶଗ୍ରହଣ ଲାଗି ଆବଶ୍ୟକ ପ୍ରଶିକ୍ଷଣ, ସୁବିଧା ସୁଯୋଗ ଏବଂ ପ୍ରୋତ୍ସାହନ ଲାଗି ରାଜ୍ୟ ସରକାର ଆର୍ଥିକ ସହାୟତା ପ୍ରଦାନ କରିବେ। ହେଲେ ଏଥିଲାଗି ଆଇଆର୍ଏଫ୍ୟୁକୁ କେତେ ଟଙ୍କା ଦେବେ ସେ ବିଷୟରେ କୌଣସି ସୂଚନା ଦିଆଯାଇନାହିଁ।