ଯୋଡା: କେନ୍ଦୁଝର ଜିଲ୍ଲା ବାମେବାରୀ ଥାନା ଅନ୍ତର୍ଗତ ସିଲଯୋଡା ଗ୍ରାମରେ ୨୫ ରୁ ୩୦ଜଣ ଯୁବକ ମୁହଁରେ ମୁଖାପିନ୍ଧି ସୁଶାନ୍ତ କୁମାର ଖିଲାର ସହ ତାଙ୍କ ପରିବାର ଉପରେ ମରଣାନ୍ତକ ଆକ୍ରମଣ ଘଟଣାରେ ବାମେବାରୀ ପୋଲିସ ୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଖବର ହସ୍ତଗତ ହୋଇଛି । ଅଭିଯୁକ୍ତ ମାନେ ହେଲେ ସିଲଯୋଡା ଗ୍ରାମର ସଞ୍ଜୟ ଲୋହାର ଓ ଦୀପକ ବାର୍ଲା । ଅନ୍ୟ ଅଭିଯୁକ୍ତମାନଙ୍କୁ ପୋଲିସ ଖୁବ୍ ଶୀଘ୍ର ଗିରଫ କରିବ ବୋଲି ସୂଚନା ମିଳିଛି । ଘଟଣାରୁ ପ୍ରକାଶ ଯେ,୨୫ ତାରିଖ ଦିନ ପ୍ରାୟ୨୫ରୁ ଉର୍ଦ୍ଧ୍ୱ ଯୁବକ ମୁହଁରେ ମୁଖାପିନ୍ଧି ଆସି ସଂଘବଦ୍ଧ ଭାବେ ସୁଶାନ୍ତ ଖିଲାରଙ୍କ ଘରେ ପଶି ତାଙ୍କୁ ବାହାରକୁ ଘୋସାଡି ଆଣି ଅଚାନକ ମରଣାନ୍ତକ ଆକ୍ରମଣ କରିଥିଲେ । ଏହା ସହିତ ତାଙ୍କ ସ୍ତ୍ରୀଙ୍କୁ ଅଶାଳୀନ ବ୍ୟବହାର ଓ ବୁଢୀ ମାଙ୍କୁ ନିସ୍ତୁକ ମାଡ ମାରିଥିଲେ । ଘଟଣାଟିରେ ତାଙ୍କର ଜଣେ ବନ୍ଧୁ ନିର୍ମଳ ପ୍ରଧାନ ଆକ୍ରମଣକାରୀମାନଙ୍କୁ ବାରଣ କରିବାରୁ ସେମାନେ ତାଙ୍କୁ ମଧ୍ୟ ନଛାଡି ମରଣାନ୍ତକ ଆକ୍ରମଣ କରିଥିଲେ । ଏହି ଘଟଣା ସଂକ୍ରାନ୍ତରେ ବାମେବାରୀ ଥାନା ମାମଲା ରୁଜୁ ହୋଇଥିବା ବେଳେ ବାମେବାରୀ ପୋଲିସ ଘଟଣାରେ ସମ୍ପୃକ୍ତ ୨ଜଣଙ୍କୁ ଗିରଫ କରିଥିବା ଜଣାଯାଇଛି ।