ରାୟଗଡା (ନିପ୍ର) – ଗତକାଲି ଚାନ୍ଦିଲି ଥାନା ପୋଲିସକୁ ଏକ ବଡ ସଫଳତା ମିଳିଛି । ଦିଲ୍ଲୀରୁ ରାୟଗଡା ବେଆଇନ ଭାବେ ଚାଲାଣ ହେଉଥିବା ଏକ ଗୁଟଖା କଂଟେନରକୁ ଜବତ କରିବା ସହ ବିପୁଳ ପରିମାଣରେ ଗୁଟଖା ଜବତ କରିଛି । ଯାହାର ବଜାର ମୂଲ୍ୟ ଆନୁମାନିକ ୪୫ ଲକ୍ଷ ଟଙ୍କା ହେବା ବୋଲି ଜଣାପଡିଛି । କଂଟେନରରୁ ୯ ଲକ୍ଷ ବିମଳ ପାନ ମସଲା ଏବଂ ୯ ଲକ୍ଷ ଭି ୱନ୍ ଗୁଟଖା ପ୍ୟାକେଟ ଜବତ କରିଛି । କଂଟେନର ଡ୍ରାଇଭର କମଲ ଖାନ ଏବଂ ହେଲପର ବାବୁ ଖାନକୁ ଚାନ୍ଦିଲି ଥାନାରେ ଅଟକ ରଖି ଅଧିକ ପଚରା ଉଚରା କରୁଛି । ଚାନ୍ଦିଲି ପୋଲିସ ପଚରା ଉଚରା ସମୟରେ ଜବତ ହୋଇଥିବା ଗୁଟଖା ରାୟଗଡାର ଗୁଟଖା ବେପାରୀ ପ୍ରମୋଦ ସାହୁ ଓରଫ ପିଂଟୁ ସାହୁର ବୋଲି ଜଣାପଡିଛି । ଘଟଣା ସଂପର୍କରେ ରାୟଗଡା ଏସ.ପି ଡା.ଶ୍ରବଣ ବିବକେ ଏମ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଚାନ୍ଦିଲି ଥାନା ଏସ.ଆଇ ଗିରିଶ ଚନ୍ଦ୍ର ମହାରଣା ଓ ଟିମ ଅମଲାଭଟା ଅଂଚଳରେ ପେଟ୍ରୋଲିଂ କରୁଥିବା ସମୟରେ ଦିଲ୍ଲୀରୁ ରାୟଗଡା ଅଭିମୁଖେ ଆସୁଥିବା କଂଟେନରକୁ ଯାଂଚ କରି ଗୁଟଖା ଜବତ କରିଥିଲେ । ଏ ନେଇ ଚାନ୍ଦିଲି ପୋଲିସ ଥାନାରେ ୧୫୧ ତା ୦୭.୦୬.୨୦୨୦ରିଖ, ଧାରା ୧୮୮/୨୭୨/୨୭୩/୩୪ ଭାରତୀୟ ଦଣ୍ଡ ଆଇନ ଧାରା ୨୦ ନିଶା ଆଇନ ପ୍ରକାରେ ମାମଲା ରୁଜ୍ଜୁ ହୋଇଛି ।