ଶିମଳା: ହିମାଚଳ ପ୍ରଦେଶର ଅଧିକାଂଶ ସ୍ଥାନରେ ଗତ ୨୪ ମଧ୍ୟରେ ଭୀଷଣ ବର୍ଷା, କୁଆପଥର ବୃଷ୍ଟି ସହିତ ବରଫପାତ ହୋଇଛି। ଏହି ସମୟ ମଧ୍ୟରେ ଶିମଳାରେ ୮୩ ମିଲିମିଟର ବର୍ଷା ହୋଇଥିବା ଜଣାଯାଇଛି, ଯାହା ଏପ୍ରିଲରେ ଗୋଟିଏ ଦିନରେ ଏହା ସର୍ବାଧିକ ବୃଷ୍ଟିପାତ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି। ପୂର୍ବରୁ ୧୯୭୯ ଏପ୍ରିଲରେ ଏଠାରେ ସର୍ବାଧିକ ବୃଷ୍ଟିପାତ ରେକର୍ଡ କରାଯାଇଥିଲା। ବର୍ଷା ଓ ବରଫପାତ ଯୋଗୁଁ ରାଜ୍ୟରେ କେତେକ ସ୍ଥାନରେ ଭୂସ୍ଖଳନ ଘଟିଥିବା ଖବର ମିଳିଛି। ଭୂସ୍ଖଳନ କାରଣରୁ କିନୋର ନିକଟରେ ଜାତୀୟ ରାଜପଥ ଅବରୋଧ ହୋଇଛି। ରାଜ୍ୟର ଉଚ୍ଚ ପାର୍ବତ୍ୟାଞ୍ଚଳରେ ବରଫପାତ ହୋଇଛି। ବିଶେଷକରି ଲାହୁଲ ଉପତ୍ୟକା ଏବଂ ମନାଲି-ଲେହ ରାଜପଥ ବରଫପାତ କାରଣରୁ ବାରାଲାଚା ପାସ୍ ନିକଟରେ ଅବରୋଧ ହୋଇଛି। ପାଣିପାଗ କାର୍ଯ୍ୟାଳୟ ସୂତ୍ର ଅନୁଯାୟୀ ରାଜ୍ୟରେ ଆଗାମୀ ୨୪ ଘଣ୍ଟା ମଧ୍ୟରେ ଅଧିକାଂଶ ସ୍ଥାନରେ ବର୍ଷା, କୁଆପଥର ବୃଷ୍ଟି ହେବା ସମ୍ଭାବନା ରହିଛି। ପ୍ରତିକୂଳ ପାଗ ଯୋଗୁଁ ଅନେକ ଗୃହପାଳିତ ପ୍ରାଣୀଙ୍କର ମୃତ୍ୟୁଘଟିଛି। ତତ୍ସହିତ ଲାହୁଲ-ସ୍ପିତିର ଅନେକ ଅଞ୍ଚଳକୁ ବିଦ୍ୟୁତ ସଂଯୋଗ ବିଚ୍ଛିନ୍ନ ହୋଇପଡିଛି। ସୋଲାନରେ ମଧ୍ୟ ଭୂସ୍ଖଳନ କାରଣରୁ ରାସ୍ତା ଅବରୋଧ ହୋଇଛି। ଅଶ୍ୱନୀ ଖାଦ ଉପରେ ଥିବା ଏକ ସେତୁ ଧୋଇଯିବା କାରଣରୁ ବହୁ ଗ୍ରାମକୁ ଯୋଗଯୋଗ ବିଚ୍ଛିନ୍ନ ହୋଇଯାଇଛି।