ବାଲିକୁଦା: ଗତ ଦୁଇ ଦିନ ତଳେ ବାଲିକୁଦା ପୁଲିସ ଗିରଫ କରିଥିବା ୬ ଜଣ ଚୋରଙ୍କୁ ଆଜି କୋର୍ଟ ଚାଲାଣ କରିଛି । ଏସପିଙ୍କ ନିର୍ଦେଶରେ ଗଠିତ ସ୍ୱତନ୍ତ୍ର ଟିମ ଓ ବାଲିକୁଦା ପୁଲିସର ମିଳିତ ଚଢଉ କ୍ରମେ ଏହି ଚୋର ମାନଙ୍କୁ କାବୁ କରା ଯାଇ ପାରିଥିଲା । ସମସ୍ତ ଚୋରଙ୍କ ଘର ତିର୍ତୋଲ ଥାନା ଅଂଚଳରେ ହୋଇଥିବା ବେଳେ ସେମାନେ ବାଲିକୁଦା ଅଂଚଳର ବିଭିନ୍ନ ଗାଁରୁ ଚୋରି କରୁଥିବା ଜନା ପଡିଥିଲା । ଏହି ୬ ଜଣଙ୍କ ମଧ୍ୟରୁ ଦୁଇ ଜଣ ମୋବାଇଲ ଚୋରୀ ଘଟଣା ସମ୍ପୃକ୍ତ ଥିବା ବେଳେ ଅନ୍ୟ ସମସ୍ତ ୪ ଜଣ ବିଭିନ୍ନ ଗାଁର ଘର ଓ ଦୋକାନ ମାନଙ୍କରୁ ଚୋରୀ କରିଥିବା ସ୍ୱିକାର କରିଛନ୍ତି । ତେବେ ଚୋର ମାନଙ୍କ ଠାରୁ କୌଣସି ଚୋରୀ ଜିନିଷ ଜବତ କରାଯାଇ ପାରି ନ ଥିବା ବେଳେ ମୋବାଇଲ ଚୋରୀ ଘଟଣାରେ ଗିରଫ ଦୁଇ ଚୋରଙ୍କ ଠାରୁ ଦୁଇଟି ମୋବାଇଲ ଜବତ କରାଯାଇଛି । ଏହି ଚୋର ମାନଙ୍କ ଘର ତିର୍ତୋଲ ଥାନା ଅଂଚଳରେ ହୋଇଥିବା ବେଳେ ପୋଷଳ (ଶଙ୍ଖେଶ୍ୱର) ଗାଁର ଧନେଶ୍ୱର ଦାସ (୨୨) ମୁନା ଦାସ (୩୦) ସେହିପରି ଏହି ଥାନା ଅନ୍ତର୍ଗତ ଗୋରଡ ଗାଁର ସଞ୍ଜୟ ସାହୁ (୩୬)ଓ ତାଳପଡା ଗାଁର ନିରଞ୍ଜନ ସାହୁ(୬୨)ଙ୍କୁ ମଧ୍ୟ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । ଚୋର ମାନେ ବିଭିନ୍ନ ସ୍ଥାନରୁ ଚୋରୀ କରି ନିରଞ୍ଜନକୁ ଦେଇଥିବା ସ୍ୱିକାର କରିଛନ୍ତି । ହେଲେ ନିରଞ୍ଜନଙ୍କ ନିକଟରୁ କୌଣସି ଚୋରୀ ଜିନିଷ ଜବତ କରାଯାଇ ପାରି ନାହିଁ । ଚୋରୀ ଏ ନେଇ ବାଲିକୁଦା ଥାନାରେ ୧୩୨/୨୦ରେ ମାମଲା ରୁଜୁ କରାଯାଇଛି । ଅନ୍ୟ ପକ୍ଷରେ ମୋବାଇଲ ଚୋରୀ ଘଟଣାରେ ୧୬୮/୨୦ରେ ମାମଲା ରୁଜୁ କରି ବାଲିକୁଦା ପୁଲିସ ତିର୍ତୋଲ ଥାନା ଅଧୀନ ଗୋବିନ୍ଦପୁର ଗାଁର ସୂର୍ଯ୍ୟପ୍ରକାଶ ବେହୁରା ଓ ପ୍ରଳୟ ନାୟକଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହି ଦୁଇ ମୋବାଇଲ ଚୋରଙ୍କ ଠାରୁ ଦୁଇଟି ମୋବାଇଲ ଜବତ କରିଛି ପୁଲିସ ।