ଗୋଖାଦ୍ୟ ଭରା ଟ୍ରକ୍ ଓଲଟି ଡ୍ରାଇଭର ମୃତ୍ୟୁ
ଜଟଣୀ: ଜଟଣୀଥାନା ପାଣ୍ଡିଆବିଲି ଓ ବୁଢ଼ାଙ୍ଗରା ଗ୍ରାମକୁ ଯିବା ପାଇଁ ଥିବା ଅସ୍ଥାୟୀ ମାଟିରାସ୍ତାରେ ଏକ ୪୦୭ ଟ୍ରକ୍ ଓଲଟି ପଡ଼ିବାରୁ ଏହାର ଡ୍ରାଇଭରଙ୍କ ମୃତ୍ୟୁ ଘଟିଛି । ମୃତ ଡ୍ରାଇଭରଙ୍କ ନାମ ଦିବାକର ପରିଡ଼ା(୩୩) । ଡେଲାଙ୍ଗ ବ୍ଲକ ଶ୍ରୀପତିପୁର ଗ୍ରାମରେ ତାଙ୍କ ଘର । ହେଲ୍ପର ପ୍ରମୋଦ ମଲ୍ଲିକ ସାମାନ୍ୟ ଆହତ ହୋଇଛନ୍ତି । ଆଜି ପୂର୍ବାହ୍ନ ପ୍ରାୟ ୧୧ଟାରେ ଏହି ଦୁର୍ଘଟଣା ଘଟିଥିଲା । ଗୋଖାଦ୍ୟ ଭରା ଟ୍ରକଟି ଏହି ରାସ୍ତା ଦେଇ ଜଟଣୀରୁ ତିଗିରିଆ ଯାଉଥିବା ବେଳେ ରାସ୍ତାରୁ ଖସିପଡ଼ି ପାଶ୍ୱର୍ରେ ଥିବା ନଈପାଣିରେ ପଡ଼ିଥିଲା । ବିଶେଷ ପାଣି ନଥିଲେ ମଧ୍ୟ ଟ୍ରକ୍ତଳେ ଡ୍ରାଇଭର ଚାପି ହୋଇରହି ଯାଇଥିଲେ । ନିକଟବର୍ତୀ ଗ୍ରାମବାସୀ ଓ ଅଗ୍ନିଶମ ବିଭାଗ କର୍ମଚାରୀ ପହଂଚି ଟ୍ରକ୍ ମଧ୍ୟରୁ ଡ୍ରାଇଭର ଓ ହେଲ୍ପରଙ୍କୁ ବାହାର କରିଥିଲେ । ଡ୍ରାଇଭର ଦିବାକରଙ୍କୁ ଖୋର୍ଦ୍ଧା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ ।