ସାରା ବିଶ୍ଵରେ ଏବେ କରୋନା ମହାମାରୀର ପ୍ରକୋପ ଜାରି ରହିଛି। ସଂକ୍ରମଣକୁ ନିୟନ୍ତ୍ରଣ କରିବା ଲାଗି ସବୁ ଦେଶ ଉଦ୍ୟମ ଚଳାଇଛନ୍ତି। ଲକ୍ଡାଉନ, ସଟ୍ଡାଉନ ଲାଗୁ କରିବା ଭଳି ପଦକ୍ଷେପ ନେଉଛନ୍ତି। କୋଭିଡ ନିୟମ ପାଳନ କରିବାକୁ ସରକାର ନିର୍ଦେଶ ଜାରି କରୁଛନ୍ତି। କିନ୍ତୁ ନରୱେ ପ୍ରଧାନମନ୍ତ୍ରୀ ଏର୍ନା ସୋଲବର୍ଗ ଖୋଦ ନିଜେ କୋଭିଡ ନିୟମ ଉଲ୍ଲଂଘନ କରି ଚର୍ଚ୍ଚାକୁ ଆସିଛନ୍ତି। ଏଥିପାଇଁ ପୁଲିସ ତାଙ୍କୁ ଜରିମାନା ମଧ୍ୟ କରିଛି।
ଗତକାଲି ନରୱେ ପୁଲିସ ପକ୍ଷରୁ କୁହାଯାଇଛି ଯେ, ପ୍ରଧାନମନ୍ତ୍ରୀ ଏର୍ନା ସୋଲବର୍ଗ ନିଜର ଜନ୍ମଦିନ ପାଳିବା ଲାଗି ପରିବାର ଲୋକଙ୍କ ସହିତ ଏକତ୍ର ହୋଇଥିଲେ। ଏହାଦ୍ବାରା କୋଭିଡ-୧୯ ସାମାଜିକ ଦୂରତା ନିୟମ ଭଙ୍ଗ ହୋଇଥିଲା। ଫଳରେ ପ୍ରଧାନମନ୍ତ୍ରୀଙ୍କୁ ଜରିମାନା କରାଯାଇଛି।
ପୁଲିସ କହିଛି ଯେ, ପ୍ରଧାନମନ୍ତ୍ରୀଙ୍କ ସ୍ବାମୀ ବି ଆଇନ ଉଲ୍ଲଂଘନ କରିଛନ୍ତି, କିନ୍ତୁ ତାଙ୍କ ଉପରେ ଜରିମାନା ଲାଗୁ ହୋଇନାହିଁ। ଯେଉଁ ରେଷ୍ଟୁରାଣ୍ଟରେ ପ୍ରଧାନମନ୍ତ୍ରୀ ପାର୍ଟି ଆୟୋଜନ କରିଥିଲେ ସେହି ରେଷ୍ଟୁରାଣ୍ଟ ବି ନିୟମ ଭଙ୍ଗ କରିଛି। କିନ୍ତୁ ରେଷ୍ଟୁରାଣ୍ଟ ଉପରେ ଜରିମାନା ଲାଗୁ ହୋଇନି।