ଜୟପୁର: ରବିବାର କୋରାପୁଟ ଜିଲ୍ଲା ଜୟପୁର ଉପ-କାରାଗାରରେ ଏସ୍ପି ବରୁଣ ଗୁଣ୍ଠପାଲିଙ୍କ ନେତୃତ୍ୱରେ ଚଢ଼ଉ କରାଯାଇଥିଲା । ଏହି ଚଢ଼ଉ ବେଳେ ଜେଲ୍ରେ ଥିବା କିଛି ବିଚାରାଧୀନ କଏଦୀଙ୍କ ଠାରୁ ୧୮,୨୦୬ ଟଙ୍କା, ଗୋଟିଏ ମୋବାଇଲ୍ ଫୋନ୍, ଗୋଟିଏ ପେନ୍ଡ୍ରାଇଭ୍, ତିନି ସେଟ୍ ଡମ୍ବଲ୍, ତିନିଟି ଲୁହା ରଡ୍ ଓ କିଛି ପ୍ୟାକେଟ୍ ଖଇନି ଜବତ କରାଯାଇଛି । ଗଞ୍ଜେଇ ଚାଲାଣ ଅଭିଯୋଗରେ ଗିରଫ ହୋଇ ଏଠାରେ ରହିଥିବା କିଛି ବିଚାରାଧୀନ କଏଦୀଙ୍କ ଠାରୁ ଏହି ସବୁ ଜିନିଷ୍ ଜବତ କରାଯାଇଛି । ଏଥିରେ ଜେଲ୍ର ସମସ୍ତ ୮ଟି ଯାକ ପୁରୁଷ ୱାର୍ଡ ଓ ଗୋଟିଏ ମହିଳା ୱାର୍ଡରେ ଯାଞ୍ଚ କରାଯାଇଥିଲା । ଏହି ଚଢ଼ାଉରେ ଜୟପୁର ଉପଜିଲାପାଳ ହେମକାନ୍ତ ସାଏ, ଅତିରିକ୍ତ ଏସ୍ପି ଉତ୍କଳ ରଞ୍ଜନ ଦାଶ, ଜୟପୁର ଏସ୍ଡିପିଓ ଅରୂପ ଅଭିଷେକ ବେହେରା, ବୋରିଗୁମ୍ମା ଏସ୍ଡିପିଓ ହରେକୃଷ୍ଣ ମାଝୀଙ୍କ ସମେତ ଜୟପୁର ଟାଉନ, ସଦର, ବୈପାରୀଗୁଡ଼ା ଓ କୁନ୍ଦୁରା ଥାନା ଅଧିକାରୀ ପ୍ରମୁଖ ସାମିଲ ଥିଲେ । ଏସ୍ପି ବରୁଣ ଗୁଣ୍ଠପାଲି କହିଛନ୍ତି, ସୁରକ୍ଷା ବ୍ୟବସ୍ଥା ଥିବା ସତ୍ତ୍ୱେ ଜେଲ୍ ଭିତରକୁ ମୋବାଇଲ୍ ସହିତ ଏତେ ସବୁ ଜିନିଷ କେମିତି ଗଲା, ତା’ର ତଦନ୍ତ କରାଯିବ।