ମୁମ୍ବାଇ: ଦେଶରେ କରୋନାର ଦ୍ୱିତୀୟ ପର୍ଯ୍ୟାୟ ସଂକ୍ରମଣ ଜନିତ ଗୁରୁତର ସ୍ୱାସ୍ଥ୍ୟ ସଙ୍କଟ ପରିସ୍ଥିତିକୁ ଦୃଷ୍ଟିରେ ରଖି ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଅକେତେକ ଗୁରୁତ୍ୱପୂର୍ଣ୍ଣ ଆର୍ଥିକ ପଦକ୍ଷେପ ସହ ୫୦ହଜାର କୋଟି ଟଙ୍କାର କୋଭିଡ୍ ଋଣ ଦେବାକୁ ଘୋଷଣା କରିଛି । ରିଜର୍ଭ ବ୍ୟାଙ୍କ ଗଭର୍ଣ୍ଣରା ଶକ୍ତିକାନ୍ତ ଦାସ ବ୍ୟାଙ୍କଗୁଡିକ ପାଇଁ ତିନିବର୍ଷ ଅବଧିର ୫୦ ହଜାର କୋଟି ଟଙ୍କା ପାଣ୍ଠି ଯୋଗାଇଦେବାକୁ ଘୋଷଣା କରିଛନ୍ତି । ଉକ୍ତ ଅର୍ଥକୁ ସ୍ୱାସ୍ଥ୍ୟସେବା ପ୍ରତିଷ୍ଠାନଗୁଡିକୁ କୋଭିଡ୍ ଋଣ ଆକାରରେ ଯୋଗାଇ ଦିଆଯିବ । ଏଥିସହିତ ବ୍ୟାଙ୍କଗୁଡିକ ସେମାନଙ୍କର ଆୟ ବ୍ୟୟ ଫର୍ଦ୍ଦରେ ଏକ କୋଭିଡ୍ ଋଣ ଖ।।ତା ସୃଷ୍ଟି କରିବେ । ଉକ୍ତ ଋଣ ଖାତାର ସମ ପରିମାଣ ଅର୍ଥକୁ ସେମାନେ ରିଭର୍ସ ରେପୋ ରେଟ୍ ଠାରୁ ୪୦ ବେସିସ୍ ପଏଂଟ ଅଧିକ ହାରରେ ଭାରତୀୟ ରିଜର୍ଭ ବ୍ୟାଙ୍କ ନିକଟରେ ଜମା ରଖିବାକୁ କୁହାଯାଇଛି । ଏଥିସହିତ ରାଜ୍ୟଗୁଡିକ ପାଇଁ ଓଭରଡ୍ରାଫ୍ଟ ନିୟମରେ ଚଳିତ ବର୍ଷ ସେପ୍ଟେମ୍ବର ୩୦ ପର୍ଯ୍ୟନ୍ତ କୋହଳ କରାଯାଇଛି ।
ସେ କହିଛନ୍ତି ଯେ, ରିଜର୍ଭ ବ୍ୟାଙ୍କ ଦେଶରେ କୋଭିଡ୍ ଜନିତ ପରିସ୍ଥିତି ପ୍ରତି ବରାବର ନଜର ରଖିବ ଏବଂ ପରିସ୍ଥିତିର ମୁକାବିଲା କରିବାକୁ ଦେଶର ନାଗରିକ, ବ୍ୟବସାୟ ପ୍ରତିଷ୍ଠାନ ଏବଂ କୋଭିଡ୍ର ଦ୍ୱିତୀୟ ଲହର ଯୋଗୁଁ ପ୍ରଭାବିତ ହୋଇଥିବା ପ୍ରତିଷ୍ଠାନଗୁଡିକ ନିମନ୍ତେ ନିଜର ସମସ୍ତ ସମ୍ବଳ ଓ ସାଧନ ଉପଯୋଗ କରିବ । ଏଥିସହିତ ଅଣୁ, କ୍ଷୁଦ୍ର ଓ ଅନ୍ୟ ଅସଂଗଠିତ କ୍ଷେତ୍ର ସଂସ୍ଥାଗୁଡିକୁ ଆର୍ଥିକ ସହାୟତା ଯୋଗାଇଦେବାକୁ କ୍ଷୁଦ୍ର ଅର୍ଥ ଲଗାଣକାରୀ ବ୍ୟାଙ୍କଗୁଡିକ ପାଇଁ ରିଜର୍ଭ ବ୍ୟାଙ୍କ ଗଭର୍ଣ୍ଣର ସ୍ୱତନ୍ତ୍ର ଦୀର୍ଘମିଆଦୀ ରେପୋ ସୁବିଧା ଘୋଷଣା କରିଛନ୍ତି ।
ଶ୍ରୀ ଦାସ କହିଛନ୍ତି, କୋଭିଡ୍ର ପ୍ରଥମ ପର୍ଯ୍ୟାୟ ସଂକ୍ରମଣ ପରେ ଦେଶର ଅର୍ଥନୀତିରେ ମଜଭୁତ ପୁନରୁଦ୍ଧାର ପରିଲିକ୍ଷିତ ହେଉଥିଲା । କିନ୍ତୁ ପରିସ୍ଥିତି ପୁଣି ଖରାପ ହେବାରେ ଲାଗିଛି । ତେବେ ଏହି ସଙ୍କଟରୁ ସୁଧୁରିବା କ୍ଷମତା ଭାତରର ରହିଛି । ବ୍ୟବସାୟ ସଂସ୍ଥାଗୁଡିକ କୋଭିଡ୍ କଟକଣା ଏବଂ ଅବଦ୍ଧାଞ୍ଚଳ ମଧ୍ୟରେ କିଭଳି ନିଜର ବ୍ୟବସାୟିକ କାର୍ଯ୍ୟକଳା ଜାରି ରଖିବେ ତାହା ଶିକ୍ଷାଲାଭ କରିସାରିଛନ୍ତି । ଚଳିତ ବର୍ଷ ଭଲ ମୌସୁମୀ ବର୍ଷା ଗ୍ରାମାଞ୍ଚଳରେ ଉପଭୋକ୍ତା ଚାହିଦା ମଜଭୁତ ସ୍ଥିତିରେ ରଖିବ ।