ନୁଆଦିଲ୍ଲୀ: ୨୦୨୦ ମାର୍ଚ୍ଚ ମାସରେ କରୋନା ମହାମାରୀ ଆରମ୍ଭ ହେବାପର ଠାରୁ ବର୍ତ୍ତମାନ ପର୍ଯ୍ୟନ୍ତ ସୁପ୍ରିମକୋର୍ଟରେ ଭିଡିଓ କନଫ୍ରେନସିଂ ମାଧ୍ୟମରେ ଶୁଣାଣି ଜାରି ରହିଛି । ଯଦିବା ଏହି ଅବଧିରେ ସର୍ବୋଚ୍ଚ ନ୍ୟାୟାଳୟ କଛି ଜରୁରୀ ଓ ଗୁରୁତ୍ୱପୂର୍ଣ ମାମଲାର ଶୁଣାଣି କରି ରାୟ ପ୍ରକାଶ କରିଛନ୍ତି ହେଲେ କରୋନା ପ୍ରକୋପ ଆରମ୍ଭ ହେବା ପୂର୍ବରୁ ଯେଉଁଭଳିଭାବେ ଦେ?ନନ୍ଦିନ ୧୫୦୦ରୁ ଅଧିକ ମାମଲାର ଶୁଣାଣି ହେଉଥିଲା ତାହା ପାଖାପାଖି ୧୦୦ରୁ ୧୫କୁ ଖସି ଆସିଛି ।ସୁପ୍ରିମକୋର୍ଟର ତଥ୍ୟ ଅନୁସାରେ ମଇ ୧, ୨୦୨୧ ସୁଧା କୋର୍ଟରେ ୬୭,୮୯୮ ମାମଲା ବିଚାରଧିନ ରହିଛି । ଅପରପକ୍ଷେ,ଗତ ୧୪ମାସରେ ସୁପ୍ରିମକୋର୍ଟରେ ଓଡିଶା ସଂର୍ପକିତ ୨୦୦ରୁ ଅଧିକ ମାମଲାର ଶୁଣାଣି ହୋଇଥିବାବେଳେ ୧୦ଟି ମାମଲାରେ ରାୟ ପ୍ରକାଶ ପାଇଛି ଏବଂ ଆଉ କିଛି ମାମଲାରେ ସର୍ବୋଚ୍ଚ ନ୍ୟାୟାଳୟ ଆଦେଶ ଓ ନିର୍ଦ୍ଦେଶ ମଧ୍ୟ ଜାରି କରିଛନ୍ତି ।ହେଲେ ଓଡିଶା ସଂର୍ପକିତ ୫ଟି ପ୍ରମୁଖ ମାମଲାର ଶୁଣାଣି ଠପ୍ ପଡିଛି । ୫ଟି ମାମଲା ଗୁଡିକ ମଧ୍ୟରୁ ଦୁଇଟି ବହୁଚର୍ଚ୍ଚିତ ପୋଲାଭରମ ଓ ବଂଶଧାରା ଜଳବିବାଦ ମାମଲା,ଶ୍ରୀମନ୍ଦିର ସଂସ୍କାର ମାମଲା, ପରି ହତ୍ୟାକାଣ୍ଡ ମାମଲା ଓ କୋଟିଆ ମାମଲା ।
ପୋଲାଭରମ ପ୍ରକଳ୍ପକୁ ବିରୋଧ କରି ଓଡିଶା ଦ୍ୱାରା ୨୦୦୭ରେ ଦାଖଲ କରାଯାଇଥିବା ଅରିଜିନାଲ ସୁଟ ତଥା ଏକାଧିକ ମଧ୍ୟବର୍ତ୍ତିକାଳିନ ଆବେଦନ ଗୁଡିକ ଏବେବି ସୁପ୍ରିମକୋର୍ଟରେ ବିଚାରଧିନ ରହିଛି ।ଅରିଜିନାଲ ସୁଟ୍ ଓ ମଧ୍ୟବର୍ତ୍ତିକାଳିନ ଆବେଦନ ଗୁଡିକର ଶୁଣାଣି ୨୦୦୮ ,ଏପ୍ରିଲ ରୁ ୨୦୨୦ ଫେବୁଆରି ମଧ୍ୟରେ ୬୦ ଥର ହୋଇଥିବାବେଳେ ମାମଲାରେ କୌଣସି ନିଷ୍କସ ବାହାରି ପାରିନାହିଁ । ଅରିଜିନାଲ ସୁଟ୍ ର ଶୁଣାଣି ପାଇଁ ୨୦୧୮,ଅଗଷ୍ଟ ୨ ରେ ସର୍ବୋଚ୍ଚ ନ୍ୟାୟାଳୟ ୧୪ଟି ପ୍ରସଙ୍ଗ ଧାର୍ଯ୍ୟ କରିଥିଲେ ମଧ୍ୟ ଶୁଣାଣି ଆଜି ସୁଧା ଆରମ୍ଭ ହୋଇପାରିନାହିଁ,କରୋନାର କୋଳାହଳରେ ଏହି ମାମଲା ହଜିଗଲାଭଳି ଜଣାପଡୁଛି ।ପୋଲାଭରମ ମାମଲାର ଶୁଣାଣି କେବେ ହେବ ସେ ସଂର୍ପକରେ କିଛି ବି ସୂଚନା ମିଳୁପାରୁନଥିବାବେଳେ ଆନ୍ଧ୍ରପ୍ରଦେଶ ସରକାର ଯୁଦ୍ଦକାଳୀନ ଭିତ୍ତିରେ ପ୍ରକଳ୍ପ କାର୍ଯ୍ୟ ଶେଷ କରିବା ପାଇଁ ତତ୍ପର ଅଛନ୍ତି ।
ସେହିଭଳି ଓଡିଶା-ଆନ୍ଧ୍ର ମଧ୍ୟରେ ଲାଗିରହିଥିବା ବଂଶଧାରା ଜଳବିବାଦ ମାମଲାର ଶୁଣାଣି କରୋନା ମହାମାରୀ ଯୋଗୁଁ ଅଟକିଛି ।ଟ୍ରିବ୍ୟୁନାଲର ସେପ୍ଟମ୍ବର ୧୩,୨୦୧୭ ର ଚୁଡାନ୍ତ ରାୟକୁ ଚ୍ୟାଲେଂଜ କରି ଓଡିଶା ଦ୍ୱାରା ଦାଖଲ କରାଯାଇଥିବା ଏସଏଲପିର ଆଜି ପର୍ଯ୍ୟନ୍ତ ଗୋଟିଏ ମଧ୍ୟ ଶୁଣାଣି ହୋଇପାରିନାହି ।ଅପରପକ୍ଷେ ବଂଶଧାରା ନଦୀ ଉପରେ ଆପୋସ ବୁଝାମଣାରେ ନେରେଡି ବ୍ୟାରେଜ୍ ନିର୍ମାଣ ପାଇଁ ନିକଟରେ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଓଡିଶାର ମୁଖ୍ୟମନ୍ତ୍ରୀଙ୍କୁ ନିକଟରେ ପତ୍ର ଲେଖିଛନ୍ତି ।