ଦଲାଲକୁ ହଟାଇବାକୁ ଉପଭୋକ୍ତାଙ୍କ ଅଭିଯୋଗ
ଗୋଳାମୁଣ୍ଡା : କଳାହାଣ୍ଡି ଜିଲ୍ଲା ଗୋଳାମୁଣ୍ଡା ବ୍ଲକ କେଗାଁ ବଜାରରେ ପାତଲଘଣ୍ଟା ଆକାଶ ଛୁଆଁ ଦରରେ ବିକ୍ରି ଚାଲିଛି । ଗତ କାଲି ଶନିବାର ବଜାରରେ ସକାଳ ୧୦ଟା ପର୍ଯ୍ୟନ୍ତ ପାତଲଘଣ୍ଟା କିଗ୍ରା ପ୍ରତି ୧୨୦ ଟଙ୍କାରେ ବିକ୍ରି ଚାଲିଥିବା ବେଳେ, ପରେ କିଗ୍ରା ପ୍ରତି ୧୮୦ ଟଙ୍କାରେ ବିକ୍ରି ହୋଇଥିବା ନେଇ ଖାଉଟି ଉପଭୋକ୍ତାଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । ପିକ ଅପ ଗାଡ଼ିରେ ବହୁ ପରିମାଣରେ ପନିପରିବା ଆସୁଛି ହେଲେ ଦଲାଲ ମାନଙ୍କ କବଜାରେ ପଡି ଆକାଶ ଛୁଆଁ ଦରଦାମ ହେଉଛି ବୋଲି ଉପଭୋକ୍ତାଙ୍କ ମଧ୍ୟରେ ଅଭିଯୋଗ ହେଉଛି । ଦରଦାମ ବୃଦ୍ଧି ଉପରେ ଗରିବ ଶ୍ରେଣୀର ଲୋକଙ୍କ ମଧ୍ୟରେ ଅନେକ ପ୍ରଭାବ ପଡିଥିବା ବେଳେ ପ୍ରାୟ ଅନେକାଂଶ ଲୋକ ଦରବୃଦ୍ଧି ଯୋଗୁଁ ପାତଲଘଣ୍ଟା ସହିତ ଅନେକ ପନିପରିବା କ୍ରୟ କରିବାରେ ବଞ୍ଚିତ ହୋଇଛନ୍ତି । କେଗାଁରେ ପୋଲିସ ଥାଇ ମଧ୍ୟ ଏ ଉପରେ କୌଣସି ନିୟନ୍ତ୍ରଣ ରଖି ପାରି ନ ଥିବାରୁ ପୋଲିସ ପ୍ରତି ଲୋକଙ୍କ ଆସ୍ଥା ତୁଟି ଯାଉଛି ବୋଲି ସାଧାରଣରେ ମହଲରେ ଚର୍ଚ୍ଚା ଜୋର ଧରିଛି । ଜିଲ୍ଲା ଖାଉଟି ବିଭାଗ ଦୃଷ୍ଟି ଆକର୍ଷଣ କରି ପନିପରିବା ଦଲାଲମାନଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳବାସୀ କରିଛନ୍ତି ।