ଚମ୍ପୁଆ : ଗତକାଲି ଏକ ଚୋରା ଲୁହା ପଥର ବୋଝେଇ ଟ୍ରକକୁ ଜବତ କରିଛି ଚମ୍ପୁଆ ପୋଲିସ ।ପେଟ୍ରୋଲିଙ୍ଗ କରୁଥିବା ସମୟରେ ଯୋଡା ଖଣି ଅଞ୍ଚଳରୁ ଓଡି-୧୯କ୍ୟୁ-୯୯୦୯ ବାର ଚକିଆ ଟ୍ରକଟି ଲୁହାପଥର ବୋଝେଇ କରି ଝାଡ଼ଖଣ୍ଡ ରାଜ୍ୟକୁ ଯାଉଥିଲା । କୌଣସି ସୂତ୍ରରୁ ଖବର ପାଇ ପୋଲିସ ଉକ୍ତ ଗାଡିଟିକୁ ସ୍ଥାନୀୟ ଡାକ୍ତରଖାନା ଛକରେ ଅଟକାଇ କାଗଜପତ୍ର ଯାଞ୍ଚ କରିଥିଲେ । ଯାଞ୍ଚ ସମୟରେ ଗାଡ଼ିର କାଗଜପତ୍ର ଠିକ ନଥିବାରୁ ଗାଡି ଓ ଡ଼୍ରାଇଭର ସମେତ ଅନ୍ୟ ୩ ଜଣଙ୍କୁ ଥାନାକୁ ଆଣି ପଚରାଉଚୁରା କରାଯାଇଥିଲା । ଥାନା ଆଇଆଇସି ତ୍ରିନାଥ ସେଠୀଙ୍କ ନିର୍ଦ୍ଦେଶ କ୍ରମେ ସବ ଇନ୍ସପେକ୍ଟର ବରଦା ପ୍ରସନ୍ନ ସାହୁ ତଦନ୍ତ କରିବା ପରେ ସେମାନେ ସତକଥା ମାନି ଯାଇଥିଲେ ।ଏହି କ୍ରମରେ ଥାନା କେସ ନଂ ୨୧୮/୨୩ ରେ ଏକ ମାମଲା ରୁଜୁ କରାଯାଇ ମକରଧ୍ବଜ ପାତ୍ର (୪୨)ପି-ସ୍ଵର୍ଗତ ବେଣୁଧର ପାତ୍ର ଘର ପାଟମୁଣ୍ଡା,କୋଇଡା ,ସୁବ୍ରତ କୁମାର ସାହୁ (୪୬) ପି-ଜଳଧର ସାହୁ,ମରସୁଆଁ,ତୁରମୁଙ୍ଗା,କୁଳମଣି ମହାନ୍ତ(୩୦) ପି-ସୁରେଶ ଚନ୍ଦ୍ର ମହାନ୍ତ,ବର୍ଲ୍ଲା, ଜଗନ୍ନାଥପୁର ,ସିଂହଭୂମି ଜିଲ୍ଲା ଏବଂ ଡ଼୍ରାଇଭର ଚଙ୍ଗ ମୁଣ୍ଡା(୨୪)ପି-ଵନମୁଣ୍ଡା,ପୋଡାଡିହି ,
କୋଇଡାଙ୍କୁ ଧାରା ୪୬୫/୪୭୧/୩୩୯/୩୪ ଏବଂ ଭାରତୀୟ ଦଣ୍ଡବିଧି ଆଇନ -୨୧ଏମଏମଡିଆର ଆଇନ ୧୯୫୭ ଅନୁଯାୟୀ କୋର୍ଟ ହାଜତକୁ ପଠାଇ ଯାଇଥିବା ଆଇଆଇସି ତ୍ରିନାଥ ସେଠୀ ପ୍ରକାଶ କରିଛନ୍ତି ।