ଯାଜପୁର : ଯାଜପୁର ରୋଡ ଥାନା ରାଛିପୁର ଛକ ନିକଟରେ ଆଜି ଏକ ଅଭାବନୀୟ ଘଟଣା ଘଟିଛି । ରାସ୍ତା ମଝିରେ ଜଣେ ଶିକ୍ଷୟତ୍ରୀଙ୍କୁ ଦୁବୃତ ଗୋଡାଇ ଗୋଡାଇ ହାଣି ହତ୍ୟା କରିଛି । ଦୁବୃତର ଆକ୍ରମଣରେ ଜଣେ ଶିକ୍ଷକ ମଧ୍ୟ ଗୁରୁତର ଭାବେ ଆହତ ହୋଇଛନ୍ତି । ମୃତ ଶିକ୍ଷୟତ୍ରୀଙ୍କ ନାଁ ମହାମାୟା ଜେନା । ଗୁରୁତର ଶିକ୍ଷକଙ୍କ ନାଁ ମୋହିନୀ ମୋହନ ମୁଦୁଲି । ଆଜି ଦିନ ଦ୍ୱିପ୍ରହରରେ ମହାମାୟାଙ୍କୁ ବାଇକ୍ରେ ଧରି ମୋହିନୀ ମୋହନ ଯାଉଥିବା ବେଳେ ରାଛିପୁର ଛକ ନିକଟରେ ତାଙ୍କୁ ଦୁର୍ବୃତମାନେ ଗୋଡାଇ ଥିଲେ । ସେମାନେ ମହାମାୟାଙ୍କୁ ଅଟକାଇ ମାରଣାସ୍ତ୍ରରେ ରାସ୍ତା ଉପରେ ଗୋଡାଇ ଗୋଡାଇ ହାଣିଥିଲେ । ଫଳରେ ଘଟଣାସ୍ଥଳରେ ତାଙ୍କ ମୃତ୍ୟୁ ହୋଇଥିଲା । ଗୁରୁତର ମୋହିନୀ ମୋହନଙ୍କୁ ପ୍ରଥମେ ଚିକିତ୍ସାଲାଗି ଯାଜପୁର ରୋଡ୍ ଡାକ୍ତରଖାନାରେ ଭର୍ତି କରାଯାଇଥିଲା ବେଳେ ତାଙ୍କର ଅବସ୍ଥା ଗୁରୁତର ହୋଇପଡିବାରୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ପୋଲିସ ଘଟଣାସ୍ଥଳରେ ପହଞ୍ଚି ମୃତ ଶରୀରକୁ ଜବତ କରିବା ସହ ତଦନ୍ତ ଆରମ୍ଭ କରିଛି ।