ମୁମ୍ବାଇ- ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ଦେହାନ୍ତ ପରେ ଅନେକ ଚଳଚ୍ଚିତ୍ର ନିର୍ମାତା ତାଙ୍କ ଜୀବନକୁ ଆଧାର କରି ଫିଲ୍ମ କରିବେ ବୋଲି ଘୋଷଣା କରିଥିଲେ । ଏବେ ସୁଶାନ୍ତଙ୍କ ଜୀବନ ଦ୍ୱାରା ପ୍ରେରିତ ଚଳଚ୍ଚିତ୍ର ‘ସୁଇସାଇଡ୍ ଅର୍ ମର୍ଡର: ଏ ଷ୍ଟାର ୱାଜ ଲଷ୍ଟ’ ର ପ୍ରଥମ ପୋଷ୍ଟର ରିଲିଜ ହୋଇଛି । ଏହି ଚଳଚ୍ଚିତ୍ରର ନିର୍ମାତା ହେଉଛନ୍ତି ବିଜୟ ଶେଖର ଗୁପ୍ତା । ସେ ଏହି ପ୍ରଥମ ପୋଷ୍ଟରକୁ ନିଜ ଇଷ୍ଟାଗ୍ରାମ ଅକାଉଂଟରେ ସେୟାର କରିଛନ୍ତି । ତେବେ ଏହାର କ୍ୟାପସନରେ ଲେଖା ଅଛି ‘ ଏକ ଛୋଟ ସହରରୁ ଆସୁଥିବା ଜଣେ ଯୁବକ ଫିଲ୍ମ ଇଣ୍ଡଷ୍ଟ୍ରିରେ ନିଜର ନାଁ ବନେଇଲେ ।
ଏହା ହେଉଛି ତାଙ୍କର ଯାତ୍ରା । ଫିଲ୍ମର ପୋଷ୍ଟର ସହିତ ବିଜୟ ଶେଖର ଗୁ୍ପ୍ତା କହିଛନ୍ତି ଯେ, ଏହି ଫିଲ୍ମର ସୁଟିଂ ମୁମ୍ବାଇ ଏବଂ ପଞ୍ଜାବରେ ହେବ । ସେପ୍ଟେମ୍ବରରେ ସୁଟିଂ ଆରମ୍ଭ ହେବ । ତେବେ ଏହି ଫିଲ୍ମ ଖ୍ରୀଷ୍ଟମାସ ୨୦୨୦ରେ ରିଲିଜ୍ ହେବାର ଆଶା ରଖାଯାଇଛି । ଏହି ଚଳଚ୍ଚିତ୍ରର ମୁଖ୍ୟ ଚରିତ୍ର ଭାବେ ଟିକ୍ଟକ୍ ଷ୍ଟାର ସଚିନ ତିୱାରୀ ଅଭିନୟ କରିବେ । ତେବେ ଏହି ଫିଲ୍ମଟି କେବଳ ସୁଶାନ୍ତଙ୍କ ଜୀବନ ଦ୍ୱାରା ଅନୁପ୍ରାଣିତ ଏବଂ ଏହା ତାଙ୍କ ବାୟୋପିକ୍ ନୁହେଁ ବୋଲି ସ୍ପଷ୍ଟ କରିଛନ୍ତି ବିଜୟ ଶେଖର ଗୁପ୍ତା ।