କାନ୍ବେରା: ଭାରତ ବିପକ୍ଷରେ ଘରୋଇ ଦିନିକିଆ ସିରିଜ୍କୁ ୨-୧ରେ ଜିତିବା ସହ ଆଇସିସି କ୍ରିକେଟ୍ ବିଶ୍ବକପ୍ ସୁପର ଲିଗ୍ରେ ୪୦ ପଏଣ୍ଟ ହାସଲ କରିଛି ଅଷ୍ଟ୍ରେଲିଆ। ଏହି ୪୦ ପଏଣ୍ଟ ସହ ଅଷ୍ଟ୍ରେଲିଆ ଟେବୁଲର ଶୀର୍ଷରେ ରହିଛି। ତେବେ ୩ୟ ଦିନିକିଆକୁ ୧୩ ରନ୍ରେ ଜିତିବା ଯୋଗୁଁ ସୁପର ଲିଗ୍ ପଏଣ୍ଟ ଟେବୁଲ୍ରେ ଭାରତ ଖାତା ଖୋଲିପାରିଛି। ଏହି ବିଜୟ ଲାଗି ଭାରତକୁ ପ୍ରଥମେ ୧୦ ପଏଣ୍ଟ ମିଳିଥିଲେ ହେଁ ପ୍ରଥମ ଦିନିକିଆରେ ଧିମା ଓଭର ହାର ଯୋଗୁଁ ଭାରତର ଗୋଟିଏ ପଏଣ୍ଟ କାଟି ଦିଆଯାଇଛି। ୯ ପଏଣ୍ଟ ସହ ଭାରତ ଟେବୁଲର ୬ଷ୍ଠ ସ୍ଥାନରେ ରହିଛି। ୧୩ଟି ଦଳଙ୍କୁ ନେଇ ଚଳିତବର୍ଷଠାରୁ ଆଇସିସି କ୍ରିକେଟ୍ ବିଶ୍ବକପ୍ ସୁପର ଲିଗ୍ ଆରମ୍ଭ ହୋଇଛି। ଦିନିକିଆ କ୍ରିକେଟ୍ରେ ପ୍ରଦର୍ଶନ ଅନୁସାରେ ଦଳମାନଙ୍କୁ ପଏଣ୍ଟ ମିଳିବ। ଏହା ଆଧାରରେ ୨୦୨୩ରେ ଭାରତରେ ହେବାକୁ ଥିବା ୫୦ ଓଭରର ବିଶ୍ବକପ୍ ପାଇଁ ଦଳମାନେ ଯୋଗ୍ୟତା ଅର୍ଜନ କରିବେ। ୩୦ ପଏଣ୍ଟ ସହ ବିଶ୍ବ ଚମ୍ପିଆନ୍ ଇଂଲଣ୍ଡ ୨ୟ ସ୍ଥାନରେ ଥିବା ବେଳେ ୨୦ ପଏଣ୍ଟ ସହ ପାକିସ୍ତାନ ୩ୟ ସ୍ଥାନରେ ରହିଛି। ଜିମ୍ବାୱେ ଓ ଆୟରଲାଣ୍ଡ ୧୦ ପଏଣ୍ଟ ଲେଖାଏଁ ପାଇଁ ୪ର୍ଥ ଓ ୫ମ ସ୍ଥାନରେ ରହିଛନ୍ତି।