ନୂଆଦିଲ୍ଲୀ : ଏୟାର ଇଣ୍ଡିଆର ଏକ ୪ ଜଣିଆ ମହିଳା ପାଇଲଟ ଦଳ ବିଶ୍ବର ଦୀର୍ଘତମ ଉଡ଼ାଣ କରୁଛନ୍ତି। ଜାନୁଆରୀ ୯ ରାତି ୯ଟା ୫୦ରେ ସେମାନେ ଆମେରିକାର ସାନ୍ଫ୍ରାନ୍ସିସ୍କୋରୁ ଏହି ଉଡ଼ାଣ ଆରମ୍ଭ କରି ପ୍ରାୟ ୧୮ଘଣ୍ଟା ପରେ ବେଙ୍ଗାଲୁରୁରେ ପହଞ୍ଚିବେ ବୋଲି ଆକଳନ କରାଯାଇଛି। କ୍ୟାପଟେନ୍ ଜୋୟା ଅଗରୱାଲଙ୍କ ନେତୃତ୍ବରେ ଏହି ଚାରି ଜଣିଆ ମହିଳା ବୈମାନିକ ଦଳରେ ତନ୍ମୟୀ ପାପାଗାରି, ଆକାଂକ୍ଷା ସୋନାୱାନେ ଓ ଶିବାଙ୍ଗୀ ମାନହଂସ ସାମିଲ ହୋଇଛନ୍ତି। ସେମାନେ ଉତ୍ତର ମେରୁ ଉପର ଦେଇ ବୋଇଂ-୭୭୭ ଏସ୍ଏଫ୍ଓ-୨୦୦ ବିଏଲଆର ବିମାନରେ ମୋଟ ୧୬ହଜାର କିଲୋମିଟର ପଥ ଅତିକ୍ରମ କରିବେ। ଏହି ଉଡ଼ାଣ ପଥ ବିଶ୍ବର ଦୀର୍ଘତମ ବୋଲି ଏୟାର ଇଣ୍ଡିଆ ପକ୍ଷରୁ କୁହାଯାଇଛି। ଏହି ବିମାନର ଯାତ୍ରୀ କ୍ଷମତା ୧୨ ବିମାନ କର୍ମଚାରୀଙ୍କ ସହିତ ୨୩୮ ରହିଛି। ଜୋୟାଙ୍କର ଏହା ପ୍ରଥମ ଉଲ୍ଲେଖନୀୟ ଉଡ଼ାଣ ନୁହେଁ। ପୂର୍ବରୁ ୨୦୧୩ରେ ସେ ସର୍ବକନିଷ୍ଠ ମହିଳା ପାଇଲଟ ଭାବେ ବୋଇଂ-୭୭୭ ବିମାନ ଉଡ଼ାଇଥିଲେ। ଏବେ ବିଶ୍ବର ଦୀର୍ଘତମ ପଥ ବିମାନ ଉଡ଼ାଇବା ତାଙ୍କ ପାଇଁ ଏକ ସ୍ବର୍ଣ୍ଣିମ ସୁଯୋଗ ବୋଲି ସେ କହିଛନ୍ତି। ସେ ୮ହଜାର ଘଣ୍ଟାରୁ ଅଧିକ ସମୟ ବିମାନ ଉଡ଼ାଇବାର ଅଭିଜ୍ଞତା ରଖିଛନ୍ତି। ସୂଚନାଯୋଗ୍ୟ ଯେ ପ୍ରଥମ ଥର ପାଇଁ କେବଳ ମହିଳା ଚାଳକମାନେ ପଶ୍ଚିମ ରେଳବାଇର ଏକ ମାଲବାହୀ ଟ୍ରେନ୍କୁ ମୁମ୍ବଇରୁ ଗୁଜରାତର ଭଦୋଦରା ପର୍ଯ୍ୟନ୍ତ ଚଳାଇ ରେକର୍ଡ ସୃଷ୍ଟି କରିଛନ୍ତି।