ନୂଆଦିଲ୍ଲୀ : ଅଣୁ, କ୍ଷୁଦ୍ର, ମଧ୍ୟମ ଉଦ୍ୟୋଗ ଏମ୍ଏସ୍ଏମ୍ଇର ନୂତନ ଅନ୍ଲାଇନ୍ ବ୍ୟବସ୍ଥା ‘ଉଦ୍ୟମ’ ପୋର୍ଟାଲରେ ୧୧ ଲକ୍ଷରୁ ଊର୍ଦ୍ଧ୍ବ ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ସେମାନଙ୍କର ନାମ ପଞ୍ଜୀକୃତ କରିଛନ୍ତି। ଚଳିତବର୍ଷ ଜୁଲାଇ ପହିଲାରୁ ଏହି ପଞ୍ଜିକରଣ ପ୍ରକ୍ରିୟା ଆରମ୍ଭ ହୋଇଛି। ପଞ୍ଜୀକରଣ ସଂକ୍ରାନ୍ତ ଏହି ପୋର୍ଟାଲକୁ ସିବିଡିଟି ଏବଂ ଜିଏସ୍ଟି ନେଟ୍ୱାର୍କ ସହ ସଂଯୋଗ କରାଯାଇଛି। ମନ୍ତ୍ରଣାଳୟ କହିଛି ପୁରୁଷ ଉଦ୍ୟୋଗୀ ମାଲିକାନାରେ ସାତଲକ୍ଷ ୯୮ହଜାର ଉଦ୍ୟୋଗ ଏବଂ ମହିଳା ଉଦ୍ୟୋଗୀ ମାଲିକାନାରେ ଏକଲକ୍ଷ ୭୩ହଜାର ଉଦ୍ୟୋଗ ପରିଚାଳିତ ହେଉଛି। ନିର୍ମାଣ ବିଭାଗ ଅଧୀନରେ ୩ ଲକ୍ଷ ୭୨ହଜାର ଉଦ୍ୟୋଗ ପଞ୍ଜିକୃତ ହୋଇଥିବାବେଳେ ୬ଲକ୍ଷ ୩୧ ହଜାର ଉଦ୍ୟୋଗ ବିଭିନ୍ନ ସେବା ବିଭାଗ ଅଧୀନରେ ପଞ୍ଜିକୃତ ହୋଇଛି। ଏଥିସହିତ ଦିବ୍ୟାଙ୍ଗ ଉଦ୍ୟୋଗୀଙ୍କ ଦ୍ୱାରା ପରିଚାଳିତ ୧୧ ହଜାରରୁ ଊର୍ଦ୍ଧ୍ବ ଉଦ୍ୟୋଗ ପଞ୍ଜିକୃତ ହୋଇଛି।