ନୂଆଦିଲ୍ଲୀ: ଦିଲ୍ଲୀ ସଫଦରଜଙ୍ଗ ହସ୍ପିଟାଲ ୪ର୍ଥ ମହଲାରେ ଅଗ୍ନିକାଣ୍ଡ ଘଟିଛି। ଓପିଡ଼ି ନିକଟରେ ଥିବା ସିଷ୍ଟର ଚେଜିଂ ରୁମରେ ଅଗ୍ନିକାଣ୍ଡ ଘଟିଥିଲା। ତେବେ ପୁଲିସ ଏବଂ ଅଗ୍ନିଶମ କର୍ମଚାରୀଙ୍କ ତ୍ବରିତ ପଦକ୍ଷେପ ଯୋଗୁ ଏକ ବଡ଼ ଅଘଟଣ ଟଳି ଯାଇଥିଲା। ଅଗ୍ନିଶମ ଅଧିକାରୀଙ୍କ ସୂଚନା ଅନୁସାରେ, ଗୁରୁବାର ଅପରାହ୍ନ ପ୍ରାୟ ୧ଟା ୧୮ ମିନିଟରେ ସିଷ୍ଟର ଚେଜିଂ ରୁମରେ ନିଆଁ ଲାଗିଥିଲା। ସେଠାରେ ଉପସ୍ଥିତ ହସ୍ପିଟାଲ କର୍ମଚାରୀ ଏବଂ ପୁଲିସ କର୍ମଚାରୀ ତୁରନ୍ତ ନିଆଁକୁ ଲିଭାଇବାକୁ ଉଦ୍ୟମ କରିଥିଲେ। ଖବର ପାଇ ଅଗ୍ନିଶମ ବାହିନୀ କର୍ମଚାରୀମାନେ ପହଞ୍ଚି ନିଆଁକୁ ଆୟତ୍ତ କରିଥିଲେ। ସିଷ୍ଟର ଚେଜିଂ ରୁମରେ ସାନିଟାଇଜର ରଖାଯାଇଥିବାରୁ ନିଆଁ ତୀବ୍ର ହୋଇଯାଇଥିଲା। ଅନ୍ୟ ୱାର୍ଡକୁ ନିଆଁ ବ୍ୟାପୀ କିଛି ବଡ଼ ଅଘଟଣ ଘଟିବା ପୂର୍ବରୁ ନିଆଁକୁ ଆୟତ୍ତ କରାଯାଇଥିଲା। ତେବେ ନିଆଁ କିପରି ଲାଗିଲା ତାହା ଜଣାପଡ଼ିନାହିଁ। ଅଗ୍ନିକାଣ୍ଡର କାରଣ ଖୋଜିବାକୁ ଉଦ୍ୟମ ଚାଲିଛି। ଶର୍ଟସର୍କିଟ ଯୋଗୁ ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି।