ବେଜିଂ: କରୋନା ପରେ ଚୀନରେ ଆଉ ଏକ ଭୂତାଣୁ ଯୋଗୁ ସଂକ୍ରାମକ ରୋଗ ବ୍ୟାପିବାରେ ଲାଗିଛି। ଏଥିରେ ବର୍ତ୍ତମାନ ସୁଦ୍ଧା ୭ ଜଣଙ୍କ ମୃତ୍ୟୁ ଘଟିଥିବାବେଳେ ୬୦ ଜଣ ସଂକ୍ରମିତ ହୋଇଥିବା ଚୀନ ସରକାରୀ ଗଣମାଧ୍ୟମ ରିପୋର୍ଟରେ ଦର୍ଶାଯାଇଛି। ସୂଚନା ଅନୁସାରେ, ଏହି ଭୂତାଣୁ ଏକ କୀଟଠାରୁ ମଣିଷକୁ ବ୍ୟାପିଛି। କିନ୍ତୁ ପରବର୍ତ୍ତୀ ସମୟରେ ମଣିଷଠାରୁ ମଣିଷକୁ ଭୂତାଣୁ ବ୍ୟାପୁଥିବା ଆଶଙ୍କା କରାଯାଉଛି। ଏହି ଭୂତାଣୁର ନାଁ ହେଉଛି ଏସଏଫଟିଏସ ବା ସିଭିୟର ଫିଭର ୱିଥ୍ ଥ୍ରୋମ୍ବୋସାଇଟୋପେନିଆ ସିଂଡ୍ରୋମ। ଏହା ଏକ କୀଟ ବାହିତ ଭୂତାଣୁ। ପୂର୍ବ ଚନର ଜିଆଙ୍ଗସୁ ପ୍ରଦେଶରେ ୩୭ ଜଣ ଏଥିରେ ଆକ୍ରାନ୍ତ ହୋଇଥିବା ଜୁନରେ ଜଣାପଡ଼ିଥିଲା। ଏହା ପରେ ଅନହୁଇ ପ୍ରଦେଶର ୨୩ ଜଣ ଆକ୍ରାନ୍ତ ହୋଇଥିବା ସୂଚନା ମିଳିଛି। ଏଥିରେ ଆକ୍ରାନ୍ତ ହୋଇଥିବା ଜଣେ ମହିଳାଙ୍କଠାରେ ଜ୍ଵର ଏବଂ କାଶର ଲକ୍ଷଣ ଦେଖିବାକୁ ମିଳିଥିଲା। ଏହା ଦ୍ବାରା ଶରୀରରେ ଲ୍ୟୁକୋସାଇଟ୍ ଏବଂ ବ୍ଲଡ୍ ପ୍ଲେଟ୍ଲେଟ୍ ହ୍ରାସ ପାଉଥିବା ଡାକ୍ତରମାନେ ଜାଣିବାକୁ ପାଇଛନ୍ତି। ପ୍ରାୟ ମାସେ କାଳ ଚିକିତ୍ସା ପରେ ସମ୍ପୃକ୍ତ ମହିଳା ସୁସ୍ଥ ହୋଇଛନ୍ତି। ଏହି ଭୂତାଣୁ ଯୋଗୁ ଅନହୁଇ ଏବଂ ଝେଜିଆଙ୍ଗ ପ୍ରଦେଶରେ ୭ ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି। ତେବେ ଏହା କୌଣସି ନୂଆ ଭୂତାଣୁ ନୁହେଁ। ୨୦୧୦ରେ ଏହି ଭୂତାଣୁ ଚୀନରେ ଠାବ ହୋଇଥିଲା।