ମୁମ୍ବଇ: ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ପ୍ରସଙ୍ଗରେ ପ୍ରଖ୍ୟାତ ଚଳଚ୍ଚିତ୍ର ନିର୍ମାତା ମହେଶ ଭଟ୍ଟଙ୍କୁ ପୁଲିସ ଜେରା କରିଛି। ନୋଟିସ ପାଇବା ପରେ ମହେଶ ଭଟ୍ଟ ସୋମବାର ମଧ୍ୟାହ୍ନ ୧୨ଟାରେ ମୁମ୍ବଇର ସାଣ୍ଟା କ୍ରୁଜ ଥାନାରେ ପହଞ୍ଚିଥିଲେ। ସେଠାରେ ପୁଲିସ ତାଙ୍କୁ ପ୍ରାୟ ୨ ଘଣ୍ଟା ଧରି ପଚରାଉଚରା କରିଥିବା ଜଣାପଡ଼ିଛି। ପୁଲିସ ମହେଶଙ୍କ ବୟାନ ରେକର୍ଡ କରିଛି। ତେବେ ପୁଲିସ ମହେଶଙ୍କୁ କ’ଣ ପଚାରିଥିଲା ଏବଂ ମହେଶ କି ଉତ୍ତର ଦେଇଥିଲେ ତାହା ସାମ୍ନାକୁ ଆସିନାହିଁ। ତେବେ ବଲିଉଡ୍ରେ ନେପୋଟିଜିମ(ଆତ୍ମୀୟତାବାଦ) ଚାଲିଛି ଏବଂ ସୁଶାନ୍ତ ଏହାର ଶିକାର ହୋଇଛନ୍ତି ବୋଲି ଯେଉଁ ଅଭିଯୋଗ ହେଉଛି ତାହା ଉପରକୁ ପରଦା ଉଠିବ କି ନାହିଁ ତାହାକୁ ନେଇ ସସ୍ପେନ୍ସ ଜାରି ରହିଛି। ସୂଚନାଯୋଗ୍ୟ, ରବିବାର ମହାରାଷ୍ଟ୍ର ଗୃହମନ୍ତ୍ରୀ ଅନିଲ ଦେଶମୁଖ କହିଥିଲେ ଯେ, ସୁଶାନ୍ତ ମୃତ୍ୟୁ ମାମଲାରେ ମହେଶ ଭଟ୍ଟ ଏବଂ କରଣ ଜୋହରଙ୍କ ମ୍ୟାନେଜରଙ୍କୁ ପଚରାଉଚରା କରାଯିବ। ପରେ କୁହାଯାଇଥିଲା ଯେ, କରଣଙ୍କ ମ୍ୟାନେଜର ନୁହେଁ, ବରଂ ଧର୍ମା ପ୍ରଡକ୍ସନର ସିଇଓ ଅପୂର୍ବ ମେହେଟ୍ଟାଙ୍କ ବୟାନ ରେକର୍ଡ ପାଇଁ ଡକାଯାଇଛି।